काठमाडौं । पूर्वसांसद वीरबहादुर लामाको निधन भएको छ । ७० वर्षिय लामाको आइतबार बिहान ४ बजे पाटन अस्पतालमा निधन भएको पारिवारिक स्रोतले जनाएको छ ।

दुवै मिर्गौलाले काम गर्न छाडेपछि लामा पछिल्लो २ वर्षदेखि नियमित डायलाइसिस गराइरहेका थिए। निमोनिया भएपछि गत सोमबार लामालाई पाटन अस्पतालको आईसीयूमा भर्ना गरिएको थियो भने बिहीबारदेखि भेन्टिलेटरमा राखिएको थियो ।

२०४९ सालमा मकवानपुर जिल्ला विकास समितिका सभापति बनेका लामा २०५६ सालमा मकवानपुर ३ बाट प्रतिनिधिसभा सदस्यमा निर्वाचित भएका थिए। २०६२÷०६३ सालको जनआन्दोलनपछि पुनर्स्थापित संसदको सदस्य रहेका लामा २०६४ सालको पहिलो संविधानसभाको चुनावमा भने पराजित भएका थिए ।

२०३३ सालमा नख्खु जेलबाट सुरुङ खनेर भाग्ने सिपी मैनालीसहितका १५ जना राजबन्दीमध्ये लामा एक थिए। जातीय पहिचानसहितको राज्यबारे तत्कालीन नेकपा एमालेभित्र विवाद भएपछि अशोक राईको नेतृत्वमा लामासहितका नेताले पार्टी छाडेका थिए । लामा तत्कालीन नेकपा एमालेका केन्द्रीय सदस्य थिए ।