धनगढी । कैलालीमा दुई प्रहरीको हत्याका योजनाकार पक्राउ परेका छन् । नेपाल प्रहरीका असई र जवान हत्या प्रकरणमा एक जना व्यापारी पक्राउ परेका हुन्।
पक्राउ पर्नेमा धनगढी उपमहानगरपालिका–५ का व्यापारी राजीव गुप्तारहेका छन् । धनगढीबाट भारततर्फ भइरहेको मटर तस्करी रोक्न खोज्दा दुई प्रहरीको हत्या गरिएको अनुसन्धानबाट खुलेको छ । सो दिन तस्करी भएको मटर गुप्ताको रहेको प्रहरीले जनाएको छ ।
अस्थायी प्रहरी पोस्ट जुगेडाका प्रमुख (असई) गोविन्द बिक र प्रहरी जवान रामबहादुर साउद हत्या प्रकरणको अनुसन्धानका लागि गुप्तालाई नियन्त्रणमा लिइएको सुदूरपश्चिम प्रदेश प्रहरी कार्यालयले जनाएको छ । प्रहरीले सो घटनामा यसअघि ८ जनालाई नियन्त्रणमा लिएको थियो । उनीहरुको बयानका आधारमा गुप्ता पक्राउ परेका हुन् ।
कात्तिक १ गते राति गस्तीमा खटिएका बेला असई बिक र जवान साउदको हत्या भएको थियो । उनीहरुको शव मोहना नदीमा फेला परेको थियो।
जिल्ला प्रहरी कार्यालय कैलालीले घटनामा संलग्न ८ जनालाई यसअघि नै पक्राउ गरी सार्वजनिक गरेको थियो। प्रहरीले धनगढी उपमहानगरपालिका– १० का ३१ वर्षीय पर्कु भन्ने रोहित राना (क), रोहित राना (ख), सोही स्थानका २० वर्षीय राजेन्द्र राना, ३० वर्षीय चोर भनिने सुरेश राना, २५ वर्षीय गब्बर भन्ने राजकुमार राना, २२ वर्षीय रामनिवास राना, २९ वर्षीय टल्लु भन्ने दलराम राना र २५ वर्षीय गोपाल भन्ने रामगोपाल रानालाई पक्राउ गरी अनुसन्धान गरिरहेको जनाएको छ।
