काठमाडौं । कोरोना भाइरसको संक्रमण तथा लकडाउनका कारण रोजगारी गुमाएर भोकै बस्न बाध्य भएका नागरिकलाई करिब तीन महिनादेखि काठमाडौंको खुलामञ्चमा खाना खुवाउने कार्यक्रम रोक्न काठमाडौं महानगरपालिकाले दिएको निर्देशनलाई चुनौती दिँदै बुधबार पनि खाना खुवाइएको छ ।
सरकारको सो निर्णयलाई चुनौती दिँदै साझा पार्टीले आज विहान र साँझको खाना खुवाउन सहयोग गरेको हो । साझा पार्टीका संयोजक रवीन्द्र मिश्रले खाना खुवाउन सहयोग गरिरहेका संस्थाहरूको समर्थनमा बुधबार बुधबार बिहान र बेलुका रोजगारविहीन असहायहरूलाई खुलामञ्चमा खाना खुवाउने बताउनुभएको छ ।
सामाजिक सञ्जाल ट्वीटमार्फत संयोजक मिश्रले सरकारको निर्णयलाई चुनौती दिँदै खाना खुवाउने काम जारी राखेको स्पष्ट पार्नुभएको छ ।
यसअघि मंगलबार साझाले विज्ञप्ति प्रकाशित गरी ‘कोरोना संक्रमणका कारण श्रमिक तथा असहायहरू भोकभोकै मर्नु पर्ने अवस्था सृजना भएका बेला सरकारनै उनीहरूको हेरचाह गर्नुपर्नेमा उल्टो नागरिक स्तरबाट भइरहेको खाना खुवाउने कार्यसमेत रोक्न निर्देशन दिनु अमानवीयताको पराकाष्ठा भएको साझाले बताएको’ थियो ।
साझाले महानगरका उक्त निर्णय तरुन्त फिर्ता लिन आग्रह गर्दै कोरोनाको कहर रहुन्जेल श्रमिक तथा असाहयलाई काम र मामको व्यवस्था गर्न समेत माग गरिएको छ।
