काठमाडौं । पूर्वसभामुख तथा प्रतिनिधि सभा सदस्य कृष्णबहादुर महराकी पत्नी सीता महराको कोरोनाका कारण निधन भएको छ ।
माइस्थेनिया नामक रोगबाट विगत १० वर्षदेखि पीडित सीताको उपचारका क्रममा बुधबार बिहान नर्भिक अस्पतालमा निधन भएको हो ।
गएको दसैँमा पुर्ख्यौली घर रोल्पा मेबाङ गएको बेला स्वास्थ्यमा सामान्य समस्या देखिएपछि उहाँलाई कार्तिक १३ गते दाङस्थित गोर्खा अस्पतालमा भर्ना गरिएको थियो । निमोनिया र स्वासप्रश्वासको समस्या देखिएपछि कार्तिक १४ गते शुक्रबार हेलिकोप्टरबाट काठमाडौं ल्याई नर्भिक हस्पिटलमा भर्ना गरिएको थियो ।
नर्भिक हस्पिटलमा पीसीआर टेष्ट गर्दा कोरोना पोजेटिभ देखिएको थियो । १५ गतेदेखि भेन्टिलेटरमा राखेर उपचार गर्ने क्रममै बुधबार आज बिहान ६ः२५ बजे निधन भएको अस्पतालले पुष्टि गरेको छ ।
उहाँको कृष्णबहादुर महरासँगै २०३५ सालमा विवाह भएको थियो । महरा दम्पत्तिका दुई छोरा र दुई छोरी रहेका छन् ।
सामान्य लेखपढ मात्रै गर्न जानेकी सीता महरा कृष्णबहादुर महरालाई पारिवारिक तथा पार्टी राजनीतिमा पनि सहयोग गर्नुभएको थियो ।
