काठमाडौँ । स्वास्थ्य मन्त्रालयले कोभिड–१९ को दैनिक ब्रिफिङलाई परिवर्तन गरी अब आइतबार र बुधवार मात्र देशभर कोरोना सङ्क्रमणको स्थिति र सङ्क्रमितको अवस्थाबारे जानकारी दिने भएको छ ।
अबदेखि हप्ताको दुई दिन आइतबार र बुधबार मात्र भिडियो ब्रिफिङ गरिने स्वास्थ्य मन्त्रालयका प्रवक्ता डा. जागेश्वर गौतमले बताए । ती दिनमा साविककै समय ४ बजेर ३० मिनेटबाट ब्रिफिङ सुरु हुने उनले जानकारी दिए। अन्य दिन त्यसबारेको जानकारी मन्त्रालयको वेबसाइट, भाइबर, फेसबुक, ट्विटर र हाम्रो स्वास्थ्य नामक मोबाइल एपमा सोही समयमै अपलोड गरिने गौतमले बताए।
आज थपिए १ हजार ९५४ जना कोरोना संक्रमित
नेपालमा पछिल्लो २४ घण्टामा थप १ हजार ९५४ जनामा कोरोना भाइरसको सङ्क्रमण देखिएको छ । स्वास्थ्य तथा जनसङ्ख्या मन्त्रालयका अनुसार ८ हजार २४८ स्वाब परीक्षण गर्दा उक्त सङ्ख्यामा सङ्क्रमित थपिएका हुन् । योसँगै नेपालमा सक्रिय सङ्क्रमितको सङ्ख्या ३९ हजार ६४३ पुगेको छ।
पछिल्लो २४ घण्टामा १ हजार ९५४ जना नै निको भएका छन भने १३ जनाको निधन भएको छ।
हालसम्म नेपालमा १ लाख ६२ हजार ३५४ जनालाई कोरोना सङ्क्रमण भइसक्दा १ लाख २१ हजार ८२४ जना निको भइसकेका छन। हालसम्म कोरोना सङ्क्रमणबाट मृत्यु हुनेको सङ्ख्या ८८७ पुगेको छ।
कुन जिल्लामा कति संक्रमित ?
पछिल्लो २४ घण्टामा काठमाडौँमा ६९६, भक्तपुरमा २९, ललितपुरमा ११८, मोरङमा २५३, सुनसरीमा २०३, काभ्रेपलान्चोकमा ८, झापामा ७८, कास्कीमा ९९, नवरपरासी पूर्वमा ५०, चितवनमा १६३, महोत्तरीमा २७, पर्सामा २० जना सङ्क्रमित भेटिएका छन् ।
काठमाडौँ उपत्यकामा मात्रै ८४३ सङ्क्रमित थपिए
काठमाडौँ उपत्यकाका तीन जिल्लामा पछिल्लो २४ घण्टामा ८४३ जना कोरोना सङ्क्रमित थपिएका छन् ।
स्वास्थ्य मन्त्रालयका अनुसार काठमाडौँमा ६९६, भक्तपुरमा २९ र ललितपुरमा ११८ जना सङ्क्रमित थपिएका हुन् ।
योसँगै काठमाडौँमा १६ हजार २०१, भक्तपुरमा १ हजार ७९ र ललितपुरमा २ हजार ३९८ जना सक्रिय सङ्क्रमित हुन पुगेका छन् ।
