धनवीर पुन, नयाँ दिल्ली ।
भारतको बेंगलोरमा तलाउमा डुबेर नेपाली विद्यार्थीको निधन भएको छ । इन्जिनियरिङ अन्तिम वर्षका विद्यार्थी सागरको शंकास्पद मृत्यु भएको बताइएको छ ।
प्रहरीले सागरसँगै नुहाउन गएका अन्य दुई जना विद्यार्थीलाई नियन्त्रणमा लिएको छ । उनीहरुमाथि थप अनुसन्धान भइरहेको बेंगलोर प्रहरीले जनाएको छ ।
मूल प्रवाह अखिल भारत नेपाली एकता समाज दक्षिण भारत क्षेत्रीय प्रतिनिधि धर्मराम विकका जेठा छोरा सागर बैतडीको पाटन नगरपालिका–१ साकारका स्थायी निवासी हुन् । २२ वर्षका सागरको २६ अक्टुबर २०२० का दिन तलाउमा डुबेर निधन भएको हो ।
सागर मूल प्रवाह अखिल भारत नेपाली एकता समाज अन्तर्गत अखिल भारत नेपाली विद्यार्थी संघ बेंगलोर दक्षिण नगर समितिका सदस्य समेत थिए । मृतक सागरको आज २७ अक्टुबरका दिन दाहसंस्कार गरिएको छ । तत्पश्चात उनको सम्मानमा श्रद्धान्जली सभाको आयोजनासमेत गरिएको छ ।
नरेश कुमार विकको सञ्चालनमा अगाडि बढेको कार्यक्रममा मूल प्रवाहका केन्द्रीय सदस्य मदन भण्डारी, दक्षिण भारत क्षेत्रीय समितिका सहसचिव रामसिंह विक, दक्षिण नगर समिति अध्यक्ष कृष्णबहादुर विक, नेपाली समाचार पत्रिका बैंगलोरका रिपोर्ट धर्म पहरीले शोक मन्तव्य व्यक्त गर्नुभएको थियो । मृतकका पिता तथा क्षेत्रीय प्रतिनिधि धर्मराम विकले घटना भएको विवरण प्रस्तुत गर्नु भएको थियो ।
यसै बीच समाजका महासचिव ठाकुर खनालले मूल प्रवाह केन्द्रीय समिति र विद्यार्थी संघको केन्द्रीय समितिको तर्फदेखि मृतकप्रति भावपूर्ण श्रद्धान्जली प्रकट गरिएको छ । महासचिव खनालले धर्म राम विकको परिवारमा पर्न गएको दुखप्रति धैर्यधारणाको कामना गर्दै गहिरो समवेदना प्रकट गर्नु भएको छ ।
