काठमाडौँ । पछिल्लो २४ घण्टामा थप २ हजार २२५ जनामा कोरोना भाइरसको नयाँ सङ्क्रमित थपिएका छन् । कुल सङ्क्रमितमध्ये १ हजार ४४६ जना पुरुष तथा ७७९ जना महिला रहेका छन् । त्यसमध्ये सबैभन्दा बढी बागमती प्रदेशमा १ हजार २१७ जना नयाँ सङ्क्रमित थपिएका हुन् ।
काठमाडौँ उपत्यकामा मात्र १ हजार ११० जना सङ्क्रमित थपिएका छन् । त्यसमध्ये ४२९ जना महिला तथा ६८१ जना पुरुष रहेका छन् । यो सङ्ख्यासँगै नेपालमा हालसम्मको जम्मा सङ्क्रमितको सङ्ख्या १ लाख ५५ हजार २३३ पुगेको छ ।
त्यसैगरी पछिल्लो २४ घण्टामा २ हजार ८४६ जना निको भएका छन् । यससँगै नेपालमा हालसम्म निको हुनेको सङ्ख्या १ लाख ८ हजार ३३४ रहेको छ । पछिल्लो २४ घण्टामा १३ जनाको मृत्यु भएको छ । नेपालमा हालसम्म कोभिड–१९ बाट ८४२ जनाले ज्यान गुमाइसकेका छन् ।
नेपालमा हाल ३०७ जना आइसियूमा रहेका छन् भने ७० जनाको भेन्टिलेटरमा राखेर उपचार भइरहेको बताइएको छ । परीक्षण गरिएकामध्ये ११.२ प्रतिशतमा सङ्क्रमण देखिएको छ भने नेपालमा मृत्युदर ०.५ प्रतिशत रहेको छ ।
