काठमाडौँ । बुधबार नेपालमा अहिलेसम्मकै धेरै कोरोना सङ्क्रमित थपिएका छन् । पछिल्लो २४ घण्टामा थप ५ हजार ७४३ जनामा कोरोना भाइरसको सङ्क्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ ।
नियमित प्रेस ब्रिफिङमा मन्त्रालयका प्रवक्ता प्राडा जागेश्वर गौतमले देशभरमा थप ५ हजार ७४३ जनामा कोरोना पुष्टि भएको जानकारी दिनुभयो । डा. गौतमका अनुसार आज देशमा सक्रिय सङ्क्रमितको सङ्ख्या ४४ हजार ४७६ रहेको छ ।
आज देशभरबाट थप दुई हजार ९९६ जना कोरोना सङ्क्रमित निको भएका छन् । योसँगै निको हुनेको सङ्ख्या ९९ हजार ६०५ पुगेको छ ।
पछिल्लो २४ घण्टामा कोरोना संक्रमणका कारण २६ जना व्यक्तिको मृत्यु भएको छ । यससँगै हालसम्म संक्रमणबाट मृत्यु हुनेको संख्या ७ सय ९१ पुगेको छ ।
काठमाडौँमै थपिए ३१ सय ७ संक्रमित
काठमाडौँ उपत्यकामा पछिल्लो २४ घण्टामा थप ३ हजार १०७ जनामा कोरोना भाइरसको सङ्क्रमण पुष्टि भएको छ । प्रवक्ता डा. गौतमले उपत्यकाका तीन जिल्लामा थप ३ हजार १०७ जनामा कोरोना पुष्टि भएको जनाकारी दिनुभयो ।
प्रवक्ता गौतमका अनुसार उपत्यकाका काठमाडौँमा २ हजार ३९१ , भक्तपुरमा १७३ र ललितपुरमा ५४३ जनामा कोरोना पुष्टि भएको हो ।
