काठमाडौँ । कोरोना भाइरस सङ्क्रमणलाई ध्यानमा राख्दै बैङ्कहरूले दसैँ बिदामा आफ्ना शाखाहरू नखोल्ने भएका छन् । गत वर्ष बडादसैँका बिदामा समेत सीमित बैङ्कका काउन्टर खोलेर सेवा प्रवाह गरेका बैङ्कले यस वर्ष कुनै पनि बैङ्क नखोल्ने निर्णय गरेका हुन् ।
बैङ्कहरूको छाता सङ्गठन नेपाल बैङ्कर्स सङ्घले सीमित शाखा खोलेर बैङकिङ सेवा दिँदा कोरोना सर्ने जोखिम बढ्ने सम्भावना भएकाले नखोल्ने निर्णय गरिएको जनाएको छ ।
सङ्घका प्रमुख कार्यकारी अधिकृत अनिल शर्मा सरकारले तोकिएअनुसार यही कार्तिक ७ देखि ११ गतेसम्म पाँच दिन सबै वाणिज्य बैङ्कका शाखा बन्द भएको निर्णय सुनाउनुहुन्छ । ‘दशैंँमा कम आवत्जावत् हुन्छ, सीमित बैङ्क मात्र खुला गर्दा बढी भिडभाड हुन सक्छ’ उहाँले भन्नुभयो– ‘अधिकांश बैङ्कका कर्मचारीमा कोरोना सङ्क्रमण पुष्टि भएको छ । सङ्क्रमणको जोखिम लिनुभन्दा पाँच दिन बन्द गर्दा उपयुक्त हुने निष्कर्षसहित बन्द गरिएको हो ।’
हाल बैङ्कहरूले एटिएम तथा डिजिटल कारोबारलाई प्राथमिकतामा राख्दै आएकाले यस पटक डिजिटल बैङकिङलाई प्रोत्साहन गरी शाखा खोलेर दिने सेवालाई बन्द गरिएको बताएका छन् । दसैँका समयमा वाणिज्य बैङ्क बन्द गर्ने कुरा नेपाल राष्ट्र बैङ्कको अधिकार क्षेत्रभित्र नपर्ने राष्ट्र बैङ्क, नियमन विभागका प्रमुख देवकुमारमा ढकाल बताउनुहुन्छ ।
सामान्यतया राष्ट्र बैङ्क खुल्ने दिन र समय बैङ्कबाट नियमन हुने सबै बैङ्क तथा वित्तीय संस्था खुला हुनुपर्छ । अहिलेको विषम परिस्थितिमा अनिवार्य रूपमा खुला गर्नुपर्छ भन्ने अवस्था नभएको उहाँको जिकिर छ ।
