काठमाडौँ । नेपालमा आज कुल ३९ हजार ३ सय ४१ सक्रिय सङ्क्रमित रहेका छन्; जसमध्ये संस्थागत आइसोलेसनमा १२ हजार ९ सय ३३ जना र होम आइसोलेसनमा २६ हजार ४ सय ८ जना रहेका छन् ।
स्वास्थ्य तथा जनसङ्ख्या मन्त्रालयले आइतबार आयोजना गरेको नियमित प्रेस ब्रिफिङमा मन्त्रालयका प्रवक्ता डा. जागेश्वर गौतमले सो जानकारी दिनुभएको हो ।
डा. गौतमका अनुसार नेपालमा पछिल्लो २४ घण्टामा २ हजार ९ सय ४२ जनामा कोभिड १९ सङ्क्रमण पुष्टि भएको छ । यससँगै हालसम्म कुल १ लाख ३२ हजार २ सय ४६ जनामा सङ्क्रमण पुष्टि भएको छ ।
यस्तै, काठमाडौँ उपत्यकामा पछिल्लो २४ घण्टामा १ हजार ६ सय ९८ जनामा सङ्क्रमण पुष्टि भएको पनि प्रवक्ता गौतमले बताउनुभयो; जसमध्ये काठमाडौँमा १ हजार ४ सय ६९ जना, भक्तपुरमा ९९ जना र ललितपुमरमा १ सय ३० जना रहेका छन् ।
पछिल्लो २४ घण्टामा कोभिड १९ बाट निको भई घर फर्किनेको सङ्ख्या २ हजार ३ सय २६ रहेको छ । यससँगै आजसम्म निको हुनेहरूको सङ्ख्या ९२ हजार १ सय ६६ पुगेको छ ।
पछिल्लो २४ घण्टामा १२ जना व्यक्तिको कोभिड–१९ सङ्क्रमणका कारण मृत्यु भएको छ । हालसम्म कोभिड सङ्क्रमणका कारण मृत्यु हुनेहरुको सङ्ख्या ७ सय ३९ पुगेको छ ।
पछिल्लो २४ घण्टामा १४ हजार ८ सय ७५ जनाको पिसिआर परीक्षण गरिएको प्रवक्ता गौतमले बताउनुभयो । यससँगै हालसम्म कुल १२ लाख ८३ हजार ३ सय ५४ जनामा पिसिआर परीक्षण भएको छ ।
आज देशभर ४ हजार ८ सय ३१ जना क्वारेन्टिनमा रहेका छन् । आइसियुमा ३ सय १ जना सङ्क्रमितको उपचार भइराखेको छ । यस्तै भेन्टिलेटरमा उपचार गराउनेहरूको सङ्ख्या ६६ जना रहेको प्रवक्ता गौतमले बताउनुभयो ।
