काठमाडौं । सरकारले कोरोनाविरुद्धको औषधि ‘रेम्डेसिभिर’ नेपालमा आयात तथा प्रयोगका लागि अनुमति दिएको छ । विश्व स्वास्थ्य संगठन (डब्लुएचओ) प्रभावहीन बताएको औषधि सरकारले नेपालमा आयात गर्न अनुमति दिएको हो ।
डब्लुएचओले कोरोनाको उपचारका लागि मान्यता नदिएको सो औषधि नेपालमा आयात, बिक्रि र प्रयोग गर्न अनुमति दिने निर्णय गरेको स्वास्थ्य तथा जनसंख्या मन्त्रालयले जनाएको छ ।
डब्लुएचओले शुक्रबार बिहान रेम्डेसिभिर नामको औषधि कोरोनाको उपचारमा प्रभावकारी नदेखिएको सार्वजनिक गरेको थियो । शुक्रबार नै सरकारले यो औषधि आयात, बिक्री र प्रयोग गर्न अनुमति दिएको सार्वजनिक सूचनामार्फत जनाएको हो।
रेम्डेसिभिरको प्रभावकारिताबारे गरिएको क्लिनिकल परीक्षणमा बिरामीको स्वास्थ्यमा त्यसले खासै कुनै सुधार ल्याउन नसकेको डब्लुएचओले ठहर गरेको छ। सो औषधिको क्लिनिकल परीक्षणहरूमा बिरामीको स्वास्थ्यमा त्यसले खासै कुनै सुधार ल्याउन नसकेको पाइएको डब्ल्यूएचओले जनाएकाे छ ।
‘फाइन्यान्शल टाइम्स’मा प्रकाशित एक विवरणमा डब्ल्यूएचओले यो नतिजाले उक्त रोगको उपचारमा विद्यमान उपलब्ध औषधिहरूको प्रयोगको आशामा धक्का लागेको बताएको छ । उक्त परीक्षणमा रेम्डेसिभिर तथा अन्य तीन औषधिको ट्रायल गरिएकाे थियाे, जसमा अस्पतालमा भर्ना भएका ११ हजार बिरामीमा प्रयोग गरिएको थियो ।
