काठमाडौं । पूर्व प्रधानमन्त्री डा. बाबुराम भट्टराईले प्रधानमन्त्री केपी शर्मा ओलीलाई ठुला भ्रष्टाचारकाण्डको छानबिन गर्न के ले रोकेको हो ? भनि प्रश्न गर्नुभएको छ । प्रधानमन्त्री ओलीको ‘भ्रष्टाचारमा शून्य सहनशीलता’ को नारालाई डा. भट्टराईले ढाँटको कुरा खाई पत्याउनु भन्दै व्यंग्य गर्नुभएको छ ।
बुढीगण्डकी आयोजनाबाट नेकपाका अध्यक्ष एवं प्रधानमन्त्री ओली र अर्का अध्यक्ष पुष्पकमल दाहाल र कांग्रेस सभापति शेरबहादुर देउवाले नौ अर्ब कमिसन खाएर आयोजना अलपत्र पारेको भट्टराईको अभिव्यक्तिले राष्ट्रिय राजनीति तरंगित भइरहेका बेला प्रधानमन्त्री ओलीले आफ्नो सरकार भ्रष्टाचारमा शून्य सहनशीलताको नीति अपनाएको दाबी गर्नुभएको छ ।
नेपाल प्रहरीको ६५ औँ प्रहरी दिवसमा अवसरमा शुक्रबार आयोजित कार्यक्रममा प्रधानमन्त्री ओलीले आफूसहित अन्य पूर्वप्रधानमन्त्रीमाथि लगाएको आरोपमा सत्यता नभएको भन्दै खण्डन गर्नुभएको थियो ।
प्रधानमन्त्रीको सोही भनाईलाई व्यंग्य गर्दै डा. भट्टराईले शुक्रबार ट्वीट गर्दै लेख्नुभएको छ, ‘प्रधानमन्त्री ओलीको भ्रष्टाचारप्रति साँच्चै शुन्य सहनशीलता हो भने बुढीगण्डकी, एनसेल, वाइडबडी, सुरक्षाप्रेस, यति, ओम्नी लगायत सबै ठूला भ्रष्टाचार प्रकरणको उच्चस्तरीय र निष्पक्ष छानबिन गर्न कसले रोकेको हो त ? कुराले हैन काम गरेर देखाउनोस्न ! नत्र ढाँटको कुरा खाई पत्याउनु ..!’
प्रम@kpsharmaoli को भ्रष्टाचारप्रति साॅच्चै शुन्यसहनशीलता हो भने बुढीगण्डकी,एनसेल,वाइडबडी,सुरक्षाप्रेस,यति,ओम्नी लगायत सबै ठूला भ्रष्टाचार प्रकरणको उच्चस्तरीय/निष्पक्ष छानवीन गर्न कसले रोकेको हो त?कुराले हैन काम गरेर देखाउनोस्!नत्र ढाॅटको कुरा खाई पत्याउनु…! https://t.co/kjMGczL3B0
— Baburam Bhattarai (@brb1954) October 16, 2020
यसअघि डा. भट्टराईको अभिव्यक्तिलाई नेपाली कांग्रेस र नेकपाले विज्ञप्ति नै जारी गरेर खण्डन गरेका छन् । तर, डा. भट्टराईले सबै ठुला भ्रष्टाचारको निष्पक्ष छानबिन गर्नुपर्ने र त्यसका लागि आफू तयार रहेको बताउँदै आउनुभएको छ ।
