काठमाडौँ । विश्वभर कोरोना सङ्क्रमणबाट मृत्यु हुनेहरूको सङ्ख्या ११ लाख नाघेको छ । पछिल्लो चौबिस घण्टामा ६ हजार ९९ जनाको मृत्यु भएसँगै मृतकको सङ्ख्या ११ लाख दुई हजार ४१७ पुगेको हो ।
गैरसरकारी अनुसन्धानकर्ताहरूको संस्था वल्र्डोमिटर्सका अनुसार शुक्रवार बिहानसम्म सबैभन्दा बढी उत्तर अमेरिकामा हालसम्म ३ दाख ३१ हजार २०५ जनाको मृत्यु भएको छ भने दक्षिण अमेरिकामा हालसम्म २ लाख ७६ हजार २०६ जनाको मृत्यु भएको छ । त्यस्तै, युरोपमा २ लाख ३५ हजार ६१६ जनाको मृत्यु भएको छ । एसियामा २ लाख १९ हजार २७४ जनाको मृत्यु भएको छ । त्यसैगरी अफ्रिकामा हालसम्म ३९ हजार १५० जनाको मृत्यु भएको छ । सबैभन्दा कम अस्ट्रेलियामा ९५१ जनाको मृत्यु भएको छ ।
एकल देशको तथ्याङ्क हेर्ने हो भने सबैभन्दा बढी अमेरिकामा हालसम्म २ लाख २२ हजार ७११ जनाको मृत्यु भएको छ भने दोस्रो स्थानमा ब्राजिल छ । त्यहाँ १ लाख ५२ हजार ५१३ जनाको मृत्यु भएको छ । तेस्रो स्थानमा भारत छ । त्यहाँ हालसम्म १ लाख १२ हजार १४४ जनाको मृत्यु भएको छ ।
सङ्क्रमणको तथ्याङ्कमा पनि सबैभन्दा शीर्ष स्थान अमेरिकामा नै छ । त्यहाँ हालसम्म कुल सङ्क्रमितको सङ्ख्या ८२ लाख १५ हजार १९६ पुगेको छ भने दोस्रो स्थानमा भारत छ । त्यहाँ ७३ लाख ६५ हजार ५३५ जना कुल सङ्क्रमित छन् । त्यसैगरी तेस्रो स्थानको ब्राजिलमा ५१ लाख ७० हजार ९९६ जना कुल सङ्क्रमित छन् । चौथो स्थानमा रहेको रुसमा १३ लाख ५४ हजार १६३ जना कुल सङ्क्रमित रहेका छन् ।
कुल सङ्क्रमितको तथ्याङ्कमा नेपाल ३७ सौँ स्थानमा छ । हिजोसम्म नेपालमा १ लाख २१ हजार ७४५ जना कुल सङ्क्रमित पुगेका छन् । हालसम्म हामीकहाँ ६९४ जनाको मृत्यु भएको छ; ८४ हजार ५१८ जना निको भएर घर फर्किसकेका छन् भने सक्रिय सङ्क्रमितको सङ्ख्या ३६ हजार ५३३ रहेको छ ।
कोरोना सङ्क्रमण फैलिन सुरु भएको चीन भने कुल सङ्क्रमितको सङ्क्रमितको तथ्याङ्कमा ५१औँ स्थानमा पुगेको छ । त्यहाँ हालसम्म ८५ हजार ६२२ कुल सङ्क्रमित छन् । मृतकको सङ्ख्या ४ हजार ६३४ मा नै स्थीर छ; ८० हजार ७४० जना निको भएर घर फर्किसकेका छन् भने सक्रिय सङ्क्रमितको सङ्ख्या २४० रहेको छ ।
