उद्वव मगर, कतार ।
गैर आवासीय नेपाली संघ (एनआरएनए) का पदाधिकारीहरुले विदेशमा रहेका नेपालीको ज्ञान तथा सिपलाई देशले सदुपयोग गर्नुपर्ने बताएका छन् । एनआरएनएको सातौं मध्यपूर्व क्षेत्रीय भेलाको पूर्व सन्ध्यामा भएको एक कार्यक्रममा उनीहरुले मध्यपूर्वमा रहेका नेपालीहरुको ज्ञानसीपलाई नेपालले भरपुर सदुपयोग गर्न सोही अनुरुपको खाका बनाएर सरकारलाई झकझक्याउनु पर्ने सुझाव दिएका हुन् ।
एनआरएनए मध्यपूर्वको यही अक्टोबर १६ र १७ तारिखमा सातौं मध्यपूर्व क्षेत्रीय भेला हुने भएको छ । भेलाको तयारीको लागि बसेको भर्चुअल बैठकका क्रममा मध्यपूर्वका देशमा रहेका नेपालीहरुको समस्या पहिचान गर्नेमात्र नभइ संभावनाहरु पनि खोजिनुपर्ने बताएका छन् ।
ग्लोबल नेप्लिज न्युज नेटवर्क जिएनएनएनले आयोजना गरेको पत्रकार सम्मेलनमा एनआरएनए आइसीसी सचिव आरके शर्माले मध्यपूर्वका नेपालीहरुमा समस्या होइन संभावना र ज्ञान, सीप पनि रहेकाले सोही अनुरुपको खाका तयार गरिनुपर्ने बताउनु भयो ।
यस्तै, एनआरएनएका सल्लाहकार टीबी कार्कीले एनआरएनएको उद्देश्य अनुरुप यतिबेला विगतको तुलनामा मुद्दाहरु फेरिएकाले पहिलेका घोषणा गरेका एजेन्डा र कोभिडपछिको अवस्थाका बारेमा विश्लेषण गरेर अघि बढ्नुपर्ने औंल्याउनुभयो।
एनआरएनए बहराइनकी अध्यक्ष लक्ष्मी गिरीले चोरबाटो भएर खाडी मुलुकमा नेपाली चेलीहरुलाई ल्याउने र घरेलु हिंसा गर्नेक्रमलाई रोक्नेगरी खाका तयार गर्नुपर्ने सुझाव दिनुभयो ।
कार्यक्रममा धारणा राख्ने अधिकांश वक्ताहरुले कोभिडको महामारीमा नेपाल सरकारको भूमिका जिम्मेवार नभएको, नेपालीहरुको समयमा उद्धार गर्न सरकार चुकेको र उदासीन बनेको बताएका थिए । कोभिडका कारण मध्यपूर्वबाट झण्डै एक लाखको हाराहारीमा नेपालीहरु फर्किएकाले उनीहरुको व्यवस्थापन गर्न सरकारलाई दबाब दिनेगरी खाका तयार गर्नुपर्ने सुझाव दिइएको थियो ।
