काठमाडौं । नेपालमा पछिल्लो २४ घण्टामा थप तीन हजार ७४९ जनामा कोरोना भाइरसको संक्रमण पुष्टि भएको छ । स्वास्थ्य तथा जनसंख्या मन्त्रालयको नियमित प्रेस ब्रिफिङका क्रममा मन्त्रालयका प्रवक्ता प्राडा जागेश्वर गौतमले बिहीबार थप ३ हजार ७४९ जनामा संक्रमण पुष्टि भएको जानकारी दिनुभयो ।
यससँगै कुल संक्रमितको संख्या १ लाख २१ हजार ७४५ पुगेको छ।पछिल्लो २४ घण्टामा थप १६ हजार ५९८ पीसीआर परीक्षण भएका छन्।
आज थप ३ हजार ५६४ जना संक्रमित निको भएका छन्। आजसम्म निको हुनेमा संख्या ८४ हजार ५१८ रहेको छ।
प्रवक्ता गौतमका अनुसार आज देशमा सक्रिय संक्रमितको संख्या ३६ हजार ५३३ रहेको छ । यस्तै गएको २४ घण्टामा १९ जनाको ज्यान गुमाएका छन् । यो सँगै कोरोना संक्रमणबाट ज्यान गुमाउनेको सङ्ख्या ६ सय ९४ पुगेको प्रवक्ता गौतमले जानकारी दिनुभयो ।
काठमाडौँ उपत्यकामा थपिए १९ सय ३५ संक्रमित
काठमाडौं उपत्यकामा पछिल्लो २४ घण्टामा थप १ हजार ९३५ जनामा कोरोना भाइरसको संक्रमण पुष्टि भएको छ । स्वास्थ्य मन्त्रालयको नियमित प्रेस ब्रिफिङमा मन्त्रालयका प्रवक्ता डा गौतमले उपत्यकामा थप १ हजार ९३५ जनामा संक्रमण पुष्टि भएको बताउनुभयो ।
उहाँका अनुसार उपत्यकामा आज काठमाठौँमा १ हजार ६९२, भक्तपुरमा १३४ र ललितपुरमा १०८ गरी १ हजार ९३५ जना संक्रमित थपिएका हुन् ।
