काठमाडौँ । कालापानी क्षेत्रको विवादमा नेपाल विरुद्ध अभिव्यक्ति दिएर चर्चामा आएका भारतीय सेनाध्यक्ष मनोजमुकुन्द नरवाणे नेपाली सेनाको मानार्थ महारथी हुने भएका छन् ।
उनी राष्ट्रपति विद्यादेवी भण्डारीबाट ‘मानार्थ महारथी’ को उपाधिका लागि नेपाल आउन लागेका हुन् ।
नेपालले लिपुलेक, लिम्पियाधुरा र कालापानीलगायत भारतले अतिक्रमण गरेको जमिनसहितको नयाँ नक्सा सार्वजनिक गरेपछि नेपाललाई च्यालेन्ज गरेका कारण विवादमा आएका थिए ।
उनको नेपाल भ्रमणबारे तयारी भइरहेको नेपाली सेनाले जनाएको छ । गत माघ २० गते नै मन्त्रिपरिषद् बैठकले भ्रमणको लागि आमन्त्रण गर्ने निर्णय गरेको थियो । तर कालापानी क्षेत्रमा भारतद्वारा नेपाली भूमि अतिक्रमणको नेपालले गरेको विरोधबारे नरवाणेले दिएको अभिव्यक्ति विवादास्पद भएका कारण र कोरोना महामारीले गर्दा उनको भ्रमण तालिका प्रभावित भएको थियो ।
रक्षा मन्त्रालयबाट स्वीकृति लिएर सेनाले भ्रमणका लागि निम्तो दिने तयारी गरेको सैनिक स्रोतले जनाएको छ । भ्रमणको मिति तय भइनसकेको तर कार्तिकमा हुने गरी तयारी सुरु गरिएको जनाइएको छ ।
नेपाल–भारतबिच एकर्काका सेनाध्यक्षलाई मानार्थ महारथीको उपाधि प्रदान गर्ने चलन छ । यसअघि भारत भ्रमणका क्रममा प्रधान सेनापति पूर्णचन्द्र थापाले भारतीय सेनापतिको मानार्थ महारथी ग्रहण गरेका थिए ।
लिपुलेक, कालापानी र लिम्पियाधुराबारे उनको अभिव्यक्तिको नेपालमा कडा विरोध भएको थियो । पछिल्ला दिनमा जनस्तरबाट सीमा अतिक्रमणको विरोध जारी रहे पनि नेपाल सरकारले सो मुद्दालाई बेवास्ता गर्दै गएको देखिन्छ ।
