काठमाडौँ । सत्तारूढ दल नेपाल कम्युनिस्ट पार्टी (नेकपा) की सांसद तथा कलाकार सानु सिवा पहाडीको निधन भएको छ । सांसद पहाडीको बुधबार सिनामङ्गलस्थित काठमाडौँ मेडिकल कलेजमा उपचारका क्रममा निधन भएको हो ।
मुटुमा समस्या देखिएपछि उहाँलाई उपचारका लागि केएमसीमा भर्ना गरिएको थियो ।
लामो समयदेखि मृर्गौला रोगबाट पीडित पहाडीको २०६३ मा भारतको तमिलनाडुको एपोलो हस्पिटलमा मृगौला प्रत्यारोपण गरिएको थियो । राजनीतिका साथसाथै उहाँ जनवादी गीतसङ्गीतको क्षेत्रमा समेत क्रियाशील हुनुहुन्थ्यो । उहाँका ‘नरोए आमा’ र ‘बाँचेछु भने’ गरी दुईवटा एल्बम प्रकाशित छन् ।
प्रधानमन्त्री केपी शर्मा ओलीले सांसद पहाडीको निधनप्रति दुःख व्यक्त गर्नुभएको छ ।
बुधबार ट्विट गर्दै ओलीले भन्नुभएको छ– ‘हाम्रो पार्टी नेकपाका तर्फबाट प्रतिनिधि सभा सदस्य, संस्कृतिकर्मी सानु शिवा पहाडीको असामयिक निधन भएकोमा दुःख लागेको छ । उहाँप्रति भावपूर्ण श्रद्धाञ्जली अर्पण गर्दै शोकसन्तप्त आफन्त र परिवारजनमा गहिरो समवेदना व्यक्त गर्दछु ।’
यस्तै, सभामुख अग्निप्रसाद सापकोटाले पनि पहाडीको निधनप्रति गहिरो दुःख व्यक्त गर्नुभएको छ ।
बुधबार ट्विट गर्दै सभामुख सापकोटाले भन्नुभएको छ– ‘प्रतिनिधि सभा सदस्य माननीय सानु सिवा पहाडीको उपचारका क्रममा ५८ वर्षको उमेरमा आज निधन भएकोमा दुःख व्यक्त गर्दै दिवङ्गत माननीय सदस्यप्रति भावपूर्ण श्रद्धाञ्जली अर्पण गर्दछु । शोकसन्तप्त परिवारजन तथा सम्पूर्ण आफन्तमा मेरो गहिरो समवेदना छ ।’
