खिमराज चालिसे, चंडीगढ़ ।
नेपालीहरुको महान पर्व दशैँ तिहारको समयमा प्रदेशबाट मिठो सपना साँचेर स्वदेश फर्कने नेपालीहरु ठाउँ ठाउँमा लुटिने गरेका घटनाहरु बारम्बार सार्वजनिक हुने गरेका छन् । लुटिनेहरु प्राय: धेरैजसोले यात्राको दौरानमा सतर्कता र सजगता नअपनाएकै कारण लुटिनुपरेको सञ्चारमाध्यममा आउने गर्दछ ।
यसरी लुटिने नेपालीको नगद र धनसम्पत्तिसहित परिवारसँगै बसेर चाडपर्व मनाउने सपना पनि लुटिने गरेको छ । तैपनि नेपालीहरु लुटिने क्रम कम भएको छैन ।
महिनौँसम्म काम गरेर चाडपर्व मनाउन घर फर्कँदै गरेका मुगुका एक नेपाली फेरि लुटिएका छन् । सोरु गाउँपालिका–११ धिमाल तलीवाडा घर बताउने हरि बहादुर मल्लका २१ वर्षीय छोरा कविराज मल्ल घर फर्कने क्रममा नेपालीबाटै लुटिएका हुन् ।
कविराज हिमाञ्चल प्रदेशको जुव्वलमा करिब साढे दुई महिना पहिला १२ जना लेवरहरु लिएर स्याउ टिप्ने काममा गएका थिए । उनी यसवर्षको दशैँ काठमाडौंमा परिवारसहित मनाउने सुन्दर सपना साँचेर भारु ६० हजार रुपैयाँ, लत्ताकपडासहितको झोला, तीन पेटी स्याउ, एक मोबाइल, आवश्यक सरसामानहरुसहित दिनांक १० अक्टुवरको हिँडेका थिए । हिमाञ्चलको शिमला आइपुग्दा २ जना नेपालीहरुसँग सोही बसमा परिचय भयो ।
ती दुई नेपालीले आफूहरु पनि रुपैडिया वोर्डर हुँदै दाङ जाने कुरा गरेपनि कविराज मल्ललाई साथी मिलेको अनुभुती भयो । छिट्टै उनीहरुको विश्वास गरे र उनीहरुले दिएको जुस पिए । त्यसपछि उनलाई थाहा नै भएन के भयो ।
अचानक १२ अक्टुवरको कविराज ब्युँझदा आफूसँग भएको ६० हजार रुपैयाँ नगद, लत्ताकपडा सहितको झोला, स्याउका पेटी, मोबाइल, आफूले लगाएका जुत्ता, व्रेसलेस, घडिसमेत लुटिएको थाहा पाए । त्यपछि उनी एक रिक्सा चालकको सहयोगमा सेक्टर २८ चंडिगढमा मूलप्रवाहका कार्यकर्ता खिमराज चालिसेको कार्यस्थल पुगेका थिए ।
त्यहाँ उनलाई सोधपुछपछि नेपालमा उनकी श्रीमती मन्जु जैसी (मल्ल) सँग कुराकानी गराइएको थियो । अहिले काठमाडौंस्थित वसुन्धरा चक्रपथमा रहेको बताउँदै उनले आफूले पैसा पठाइदिने भन्दै पीडित श्रीमानलाई जसरी पनि स्वदेश पठाइदिन आग्रह गरिन् । त्यसपछि मूल प्रवाहको पहलमा हिमाञ्चलमा वगानका मालिकसँग कुरा गरेपछि मालिक प्रकाश थापाले पाँच हजार रुपैयाँ पठाएर उनलाइ नेपाल पठाईदिन आग्रह गरेका थिए ।
यसरी नेपालीहरुले यात्राको दौरानमा सतर्कता न अपनाउँदा र नेपाली भन्ने वित्तीकै तुरुन्त विश्वास गर्दा बारम्वार यसप्रकारका घटनाहरु घटिरहने गरेका छन् । मूल प्रवाह अखिल भारत नेपाली एकता समाजले यस्ता विषयलाइ गम्भिरता पूर्वक लिँदै समय समयमा सिमामा जुलूस, पत्रकार सम्मेलन गर्ने र स्थानीय प्रशासनदेखि दुवै देशका प्रशासन र राजनीतिक नेतृत्वको ध्यानाकर्षण गराइरहेको छ । तैपनि नेपालीहरु लुटिने क्रम कम भएको छैन ।
