काठमाडौं । सरकारले चाड पर्व नजिकिएसँगै सार्वजनिक सवारी साधनका सबै सिटमा यात्रु चढाउन दिने निर्णय गरेको छ । मन्त्रिपरिषद्को सोमबार बसेको बैठकले यस्तो निर्णय गरेको स्रोतले जनायो ।
दसैँ, तिहार जस्ता चाडपर्वको समयमा यात्रुको चाप हुने भएकाले सार्वजनिक यातायातमा पनि सामाजिक सुरक्षाका मापदण्ड अपनाएर पूरा क्षमतामा यात्रु राख्न दिने र भाडा पुरानैै दरमा लिनुपर्ने निर्णय सरकारले गरेको हो ।
यसअघि सार्वजनिक सवारी साधनलाई सिट क्षमताको आधा मात्रै यात्रु बोक्न निर्देशन र ५० प्रतिशत वढी भाडा लिन छुट दिइएको थियो । त्यो निर्णय उल्टाउदै सरकारले पूर्ण सिट क्षमतामा यात्रु बोक्न दिने निर्णय गरेको हो।
यद्यपी सार्वजनिक सवारी सुाधनले अहिले भनेजति यात्रु पाउन सकेका छैनन् । यात्रु नहुँदा अहिलेसम्म दसैँको लागि अग्रिम टिकट बुकिङ पनि खुलेको छैन ।
ठूला चाडपर्व नजिकिए पनि कोरोना संक्रमण तीब्र गतिमा फैलिँदै गएको कारण सार्वजनिक सवारी साधनमा यातायात गर्नेको संख्या निकै कम छ । अधिकांश मानिसहरु यसपालि दशैँ तिहारमा यात्रा नगर्ने मनस्थिति बनाएका कारण सार्वजनिक यातायातमा यात्रु कमै देखिन्छन् ।
सिमानाका कात्तिकसम्म कडाई
सरकारले भारतसँगको सिमानाकाबाट आवतजावतमा कात्तिक मसान्तसम्मका लागि कडाइ कायमै गर्ने भएको छ । भारतमा दिनदिनै कोरोना संक्रमित बढिरहेको र नेपालमा पनि कोरोना संक्रमण बढिरहेकाले भारतसँगको नाकामा कडाइको अवस्था कायमै राखिने निर्णय भएको एक मन्त्रीले जानकारी दिए ।
कोरोना संक्रमण बढिरहेकै कारण अन्तर्राष्ट्रिय उडानको अहिलेको कोटा प्रणालीलाई कायमै राख्ने निर्णय भएको पनि मन्त्रिपरिषद स्रोतले जनाएको छ । सरकारले अन्तर्राष्ट्रिय सीमा नाकामा कडाइ गरेर आन्तरिक यातायात र व्यवसाय सञ्चालनलाई भने केही खुकुलो पार्ने निर्णय गरेको छ ।
