अर्घाखाँची । पूर्व उपप्रधानमन्त्री तथा अर्घाखाँचीका प्रतिनिधि सभा सांसद टोपबहादुर रायामाझीले शीतगङ्गाका पहिरोपीडितका लागि टेन्ट र खाद्यान्न वितरण गर्नुभएको छ । पहिरो प्रभावित क्षेत्रको स्थलगत अनुगमन गर्दै उहाँले राहत वितरण गर्नुभएको हो ।
आइतवार उक्त स्थानमा स्थलगत अनुगमन गर्दै रायमाझीले खाद्यान्न र परिवार बस्न मिल्ने ६० वटा टेन्टसमेत हस्तान्तरण गर्नुभएको हो । त्यस्तै शितगङ्गा नगरपालिका वडा नम्बर १२ मा ५१ वटा टेन्टको ब्यवस्था गर्नुभयो भने वडा नम्बर ११ मा ९ वटा टेन्ट वितरण गर्नुभयो ।
गत ९ गते पहिरो जाँदा भाँसिएको शितगङ्गा १२ को जोख्लेगैरा क्षेत्रमा उहाँले स्थलगत अनुगमन गर्दै उक्त बिपत्मा परेका घरवारविहीनहरूको ब्यवस्थापनमा सरकारसँग छिट्टै पहल गर्ने बताउनुभएको छ ।
पहिरोले करिब ५० घर विस्थापित भएकोमा दुःख व्यक्त गर्दै छिटोभन्दा छिटो स्थायी बसोवासका लागि जुट्न आफू तयार रहेको बताउनुभयो ।
सो अवसरमा शितगङ्गा नगर प्रमुख सूर्यप्रसाद अधिकारी, उपप्रमुख टीका रेस्मी ,वडाध्यक्ष बाबुराम गैरे, दुर्गा बिसी, भिम केसी, वसन्त श्रेष्ठलगायतको उपस्थित रहेको थियो ।
