मेघराज रिष्मेली, जापान ।
ओखलढुंगा टोक्सेल स्थायी घर भई जापानको आईची, प्रान्तको नागोयामा बस्दै आएका विशाल बास्तोलाको मृत्यु भएको छ । विद्यार्थी भिसामा एकवर्ष अघि जापान आएका उनि, सेप्टेम्बर २३ तारिख राति आफ्नै कोठामा अचेत अवस्थामा फेला परेका थिए ।
बास्तोलालाई बिहीबार (अक्टोबर ८ तारिख) हस्पिटलले मृत घोषणा गरेको हो । यस घटनमा सुरुवातदेखिनै सहयोगमा जुटिरहनुभएका एनआरएनए जापानका उपाध्यक्ष दिपक कार्कीका अनुसार प्रहरी अनुसन्धानले मृतकले आत्महत्या प्रयास गरेको देखाएको छ ।
यद्यपी कुनै पनि प्रकारको औषधी सेवन पनि नगरेको तथा घाँटीमा पासो लगाएर झुण्डिएको पुष्टि नभएकाले घटनाको वास्तविकता बुझ्न अझै अनुसन्धान जारी रहेको बताईएको छ ।
मृतक बास्तोला जापान आएको पनि धेरै नभएको र आर्थिक अवस्था पनि मज़बूत नभएकाले दाहसंस्कार लगायतका कार्यमा आवाश्यक रकम व्यवस्थापनका लागि जापानमै रहेका उनका दिदी भिनाजुले जापानवासी नेपाली तथा नेपाली संघसंस्थाहरुलाई सहयोगका लागि अनुरोध गरेका छन् ।
मृतक बास्तोका भिनाजु दिपेश अधिकारीका अनुसार एनआरएन जापानले यो अप्ठ्यारोमा ठूलो सहयोग गरिरहेको छ । विशेष गरी एनआरएन जापानका उपाध्यक्ष दिपक कार्की र एनआरएन नागोया क्षेत्रीय समिति अध्यक्ष श्याम शीतल लगायतका व्यक्तिहरुले घटनाको सुरूवातबाटै अस्पताल र घटनास्थलमा गएर प्रहरी अनुसन्धानको लागि पनि ठूलो पहल गर्नुभएको थियो ।
यसका साथै ओखलढुंगा सेवा समाज र पूर्वेली सेवा समाजले आर्थिक संकलन लगाएतका कामहरूमा सहयोग गरिरहेको बुझिन आएको छ ।
