पुष्कर भट्ट, महेनद्रनगर ।
कञ्चनपुरका एक विद्यार्थी ब्लड क्यान्सर र बोनम्यारोबाट पीडित भएपछि उनका सहकर्मीहरुले उपचारका लागि सहयोगको अपिल गरेका छन् । सूदूरपश्चिम विश्वविद्यालय व्यवस्थापन संकाय अन्तर्गत बीबीएस चौथो वर्षमा अध्ययनरत दिपेन्द्रबहादुर पाल ब्लड क्यान्सर र बोनम्यारोबाट पीडित बनेका हुन् ।
विगत तीन महिनायता दुवै रोगले च्यापेर उपचार गर्न आर्थिक अभाव झेलिरहेका पालको उपचारका लागि उनका सहपाठीहरुले ‘दिपेन्द्रबहादुर पाल बचाऔं अभियान’ नै सञ्चालन गरी आर्थिक संकलन सुरु गरेका हुन् ।
दार्चुला जिल्लाको लेकम गाउँपालिका–४ टकना –बुरुस्याका स्थायी बासिन्दा पाल स्वास्थ्यमा समस्या आएपछि महाकाली अस्पताल भर्नाका थिए । महाकालीमा उनको उपचार हुन नसकेपछि धनगढीको मायामेट्रो अस्पताल लगिएको थियो । त्यहाँ उपचारका क्रममा उनलाई ब्लड क्यान्सर देखिएपछि काठमाडौं रिफर गरिएको छ । अहिले उनको काठमाडौंको सिभिल अस्पतालमा उपचार भइरहेको छ ।
आर्थिक अभावका कारण उपचारमा कठिनाई भएपछि उनको जीवन बचाउन सहकर्मीहरुले अपिल गरेका छन् । सामाजिक सञ्जाल तथा प्रत्यक्ष अप्रत्यक्ष सम्पर्कका आधारमा आफूहरु पालको उपचार गर्न रकम संकलनमा लागेको अभियानमा आबद्ध विद्यार्थी शंकरदत्त जोशीले वताए ।
पालको ब्लड क्यान्सरको उपचारका लागि ९ लाख र बनम्यारो प्रत्यारोपण गर्न १६ लाख रुपैयाँ जति गरी करिब २५ लाख रुपैयाँ खर्च हुने देखिएकोले सबैलाई सहयोग गर्न अपिल गरेको दिपेन्द्र बचाऔं अभियानका अध्यक्ष विरु बोहरा र सचिव अपिल ओझाले अपिल गरेका छन् ।
