काठमाडौं । नेपाल चिकित्सक संघले अनसनरत वरिष्ठ चिकित्सक डा. गोविन्द केसीको जीवन रक्षाका लागि चरणबद्ध आन्दोलनको घोषणा गरेको छ।
बुधबार विज्ञप्ति प्रकाशित गरी संघले आकस्मिक र कोभिड–१९ का सेवाबाहेक अन्य स्वास्थ्य सेवा बहिष्कार गर्नेसम्मको घोषणा गरेको हो ।
अनसनको २४ औँ दिन बितिसक्दासमेत सरकारले वेवास्ता गरेको भन्दै डा. केसीको जीवन रक्षाका लागि आन्दोलन घोषणा गर्न बाध्य भएको संघले जनाएको छ ।
घोषित कार्यक्रम अनुसार असोज २२ गते (बिहीबार) बिहान ९ बजेदेखि ११ बजेसम्म देशभरका स्वास्थ्य संस्था तथा अस्पतालहरुमा आकस्मिक र कोभिड–१९ का सेवाबाहेक अन्य स्वास्थ्य सेवा बहिष्कार गरी धर्ना दिने कार्यक्रम छ भने बिहीबारदेखि नै देशभरका स्वास्थ्य संस्थाहरुमा स्वास्थ्य मापदण्ड अपनाइ रिले अनसन बस्ने जनाइएको छ ।
यस्तै, शुक्रबार एक दिनका लागि देशैभरका स्वास्थ्य संस्था तथा अस्पतालहरुमा आकस्मिक र कोभिड–१९ का सेवाबाहेक सम्पूर्ण स्वास्थ्य सेवा पूर्णरुपमा बहिष्कार गर्ने संघका महासचिव डा बद्री रिजालद्वारा हस्ताक्षरित विज्ञप्तिमा उल्लेख छ ।
चिकित्सक संघले वार्ता र संवादको माध्यमबाट समस्याको समाधान गर्न सरकारसँग आग्रह पनि गरेको छ । अन्थथा जस्तोसुकै परिस्थितिको सामना गर्न तयार हुन सरकारलाई चेतावनी दिँदै संघले सम्पूर्ण स्वास्थ्यकर्मीहरुलाई पनि कडा आन्दोलनका लागि तयार रहन भनेको छ ।
यसैबीच राष्ट्रिय मानवअधिकार आयोगले डा. केसीको स्वास्थ्य अवस्थाप्रति समयमै संवेदनशील बन्न सरकारसँग आग्रह गरेको छ । डा. केसीको स्वास्थ्य अवस्था सम्बन्धमा आयोगको वागमती प्रदेश कार्यालयको टोलीले आज महाराजगञ्जस्थित शिक्षण अस्पताल पुगी अनुगमन गरेकोमा निजको स्वास्थ्य अवस्था सम्बन्धमा नेपाल सरकारबाट चासोका साथ नहेरिएको पाइएको आयोगले विज्ञप्तिमार्फत जनाएको छ ।
आयोगले डा. केसीको स्वास्थ्य अवस्था एवम् नेपाल सरकारसँग विगतमा भएका सम्झौताहरुको कार्यान्वयन अवस्था सम्बन्धमा जानकारी गराउन नेपाल सरकारलाई पत्राचार गरेको विज्ञप्तिमा जनाइएको छ ।
सरकारले बनायो वार्ता टोली
यसैबीच आमरण अनसनरत डा. केसीसँग वार्ता गर्न सरकारले वार्ता टोली बनाएको छ । शिक्षा, विज्ञान तथा प्रविधि मन्त्रालयले बुधबार मन्त्रालयका सचिव गोपी मैनालीको नेतृत्वमा वार्ता टोली गठन गरेको हो । वार्ता समितिमा स्वास्थ्य तथा जनसंख्या मन्त्रालयका सहसचिव डा. गुणराज लोहनी र चिकित्सा शिक्षा आयोगका निर्देशक दिलिप शर्मा सदस्य रहेका छन् ।
डा. केसीले चिकित्सा शिक्षा र स्वास्थ्यमा सुधारको माग गर्दै २४ दिनअघि जुम्लाबाट आमरण अनसन सुरु गर्नुभएको थियो । १९ औँ पटकको सत्याग्रहमा रहेका केसीले विगतका सहमति कार्यान्वयनसँगै थप केही माग राख्नुभएको छ ।
अहिले त्रिवि शिक्षण अस्पतालमा रहेका उहाँको स्वास्थ्य अवस्था गम्भीर हुँदै जाँदासमेत सरकारले वेवास्ता गरेको भन्दै आलोचना भइरहेका बेला सरकारले वार्ता टोली गठन गरेको हो ।
