काठमाडौं । चिकित्सा शिक्षा र स्वास्थ्यमा सुधारको माग राखी अनसन बसिरहेका वरिष्ठ चिकित्सक डा. गोविन्द केसीको सत्याग्रहप्रति सरकारले पुरै वेवास्ता गरेको छ । २२ दिनदेखि अनसनरत डा. केसीको स्वास्थ्य अवस्था गम्भीर हुँदै गएको केसीका सहयोगीहरु बताउँछन् ।

डा. केसीलाई स्वास फेर्न गाह्रो भएपछि आइतबारदेखि फेस मास्कको माध्यमबाट अक्सिजन दिइएको छ । सास फेर्न गाह्रो भएको बेला एसपी ओटू (अक्सिजनको स्तर) घटेर ९०–९१ प्रतिशत भएपछि अक्सिजन दिन थालिएको हो ।

चिकित्सकहरुले आईसीयूमा भर्ना हुन गरेको आग्रह डा. केसीले अस्वीकार गर्नुभएको छ । उहाँको होस छइन्जेल इच्छाबेगर गर्न नमिल्ने भएकाले अवस्था गम्भीर भएपनि आईसीयूमा लैजान नसकिएको उपचारमा संलग्न स्वास्थ्य टोलीका संयोजक डा. सुवासप्रसाद आचार्यले बताउनुभयो ।

डा. आचार्यका अनुसार केसीको छाती, मांसपेशी दुख्ने र बाउँडिने, चक्कर लाग्ने जस्ता स्वास्थ्य समस्या पनि बढेका छन्  । ब्लड सुगर धेरै कम छ । सिरम इलेक्ट्रोलाइट्स (सोडियम पोटासियम, म्याग्नेसियम, क्याल्सियम, फस्फोरस) कमी देखिएको छ । शरीरमा पोटासियम र म्याग्नेसियमको स्तर कम हुँदा मुटुको चालमा, सोडियम र क्याल्सियम कम भए मस्तिष्कमा असर परी होस कम, छारे हुन सक्ने डा. आचार्यले बताउनुभयो ।

यसैबीच, आवासीय चिकित्सकहरुले डा. केसीको माग पुरा गरी उहाँको जीवन रक्षा गर्न माग गर्दै आन्दोलन सुरु गरेका छन् । नेसनल रेजिडेन्ट डाक्टर्स एसोसिएसन, त्रिवि शिक्षण अस्पतालका अध्यक्ष डा. सुभाष देवकोटाले डा. केसीको जीवनरक्षाका लागि कडा आन्दोलनको तयारी भइरहेको बताउनुभएको छ ।

१९ औँ सत्याग्रह जुम्लाबाट सुरु गरेका डा. केसीलाई असहज भएपछि आठौं दिनमा काठमाडौं ल्याइएको थियो । तर काठमाडौं आउँदा उहाँलाई प्रहरीले दुर्व्यवहार गर्दै जवर्जस्ती ट्रमा सेन्टर पुर्याएको थियो । त्यहाँबाट डिस्चार्ज लिएर शिक्षण अस्पताल गएका केसीले अनसन जारी राख्नुभएको छ ।

लगातार १९ औँ पटकसम्मको सत्याग्रहले गलेको शरीर, ६५ वर्षको उमेर तथा लगातार धेरै दिनसम्म अनसन जारी राख्दा केसीको स्वास्थ्य गम्भीर बन्दै गएको बताइएको छ । आम जनताको स्वास्थ्यका लागि दृढतापूर्वक उभिएका डा. केसीको गलेको शरीरले गोरखाका नन्दप्रसाद अधिकारीको नियति भोग्नुपर्ने त होइन ? शंका उत्पन्न भएको छ ।