काठमाडौँ । सिन्धुपाल्चोककी एक १७ वर्षीय किशोरी गाडीभित्रै बन्धक बनाएर दुई दिनदेखि सामूहिक बलात्कारको शिकार भएकी छन् । किशोरीमाथि गाडीका चालक र सहचालकले सामूहिक बलात्कार गरेका हुन् ।
बलात्कारमा संलग्न र चालक र सहचालक पक्राउ परेका छन् । पक्राउ पर्नेमा गाडीचालक सिन्धुपाल्चोक चौतारासाँगा नगरपालिका–१० का २२ वर्षीय निरकुमार खड्का र जुगल गाउँपालिका ४ का २१ वर्षीय सूर्य श्रेष्ठ रहेका छन् ।
गाडीभित्र युवतीको सामूहिक बलात्कार भइरहेको सूचनापछि शनिबार राति साढे ९ बजे प्रहरीले किशोरीको उद्धार गरी दुई जनालाई पक्राउ गरेको हो । पक्राउ परेकामाथि ७ दिनको म्याद लिएर अनुसन्धान भइरहेको प्रहरीले जनाएको छ ।
रत्नपार्कबाट अर्कै युवकले चाँगु नगरपालिका–८ मा लगेर बलात्कार गरेपछि भोलिपल्ट खड्का र श्रेष्ठलाई बुझाएर ती युवक भने फरार भएको प्रहरीको प्रारम्भिक अनुसन्धानमा देखिएको छ । गाडीभित्र किशोरीलाई लठ्याउने औषधि खुवाएर राखिएको थियो । प्रहरीले फरार आरोपीको खोजी गरिरहेको पनि स्पष्ट पारेको छ ।
