स्याङजा । स्याङजा जिल्लाका विभिन्न क्षेत्रमा पहिरोमा परि मृत्यु भएका तथा घाइते भएकाहरूको परिवारलाई नगद १८ लाख ५ हजार रुपियाँ राहत रकम हस्तान्तरण गरिएको छ । भूमिव्यवस्था, सहकारी तथा गरिबी निवारण मन्त्री पद्माकुमारी अर्यालले आइतबार छुट्टाछुट्टै कार्यक्रमको आयोजना गरी राहत रकम हस्तान्तरण गर्नुभएको हो ।

मन्त्री अर्यालले वालिङ नगरपालिका, गल्याङ नगरपालिका र कालीगण्डकी गाउँपालिकाका केही दिनअघि गएको पहिरोपीडितलाई नगद १८ लाख ५ हजार रुपियाँ सहयोग हस्तान्तरण गर्नुभएको हो ।

गत असोज ८ गतेको पहिरोमा परि वालिङ नगरपालिका–१४ तमादीमा मृतकको परिवारलाई १० लाख २० हजार प्रदान गरिएको छ । राहत रकम नेपाल सरकारको तर्फबाट ७ लाख र मन्त्रालयको पहलमा ३ लाख रकम मन्त्रीले प्रदान गर्नुभएको हो । असोज ८ गते घरमाथिबाट आएको पहिरोमा पुरिएर माया नेपालीको ८ जना परिवार र बहिनी उमाकला गरी ९ जनाको मृत्यु भएको थियो ।

यसैगरी, मन्त्री अर्यालले कालीगण्डकी गाउँपालिका–४ मा गत असोज ८ गते गौतमडाँडा र असार ३० गते खहरेमा पहिरोले पुरिएर मृत्यु भएका परिवारलाई राहत प्रदान गर्नुभएको छ । पहिरोपीडित परिवारको घरमै पुगेर मन्त्री अर्यालले राहत प्रदान गर्नुभएको हो । उहाँले असोज ८ गते मृत्यु भएका १७ वर्षीय विष्णु दमैको परिवालाई केन्द्र सरकारको तर्फबाट २ लाख, प्रदेश सरकारको तर्फबाट ५० हजार र सहकारीको तर्फबाट ४० हजार राहत प्रदान गर्नुभएको हो । यसैगरी, उहाँले पहिरोले घरमा क्षति पुगेको औमायाँ नेपालीलाई २० हजार र अन्य तीन परिवारलाई ५÷५ हजारका दरले सहयोग रकम हस्तान्तरण गर्नुभएको हो ।

यसैगरी, गत असार ३० गते पहिरोमा परेर मृत्यु भएका चार जनाका परिवारलाई सहकारी सङ्घका तर्फबाट २०÷२० हजार र विस्थापित चार परिवारलाई १५÷१५ हजार राहत मन्त्री अर्यालले प्रदान गर्नुभएको हो ।

वालिङ नगरपालिका–११ मा पहिरोबाट मृत्यु भएका दुर्गाबहादुर थापाको परिवार तथा घाइतेहरूलाई २ लाख ५० हजार, घाइते मुना थापालाई २० हजार, नारायणी सिञ्जाली १० हजार, दिलबहादुर परियारलाई १० हजार रुपैयाँ राहत रकम हस्तान्तरण गर्नुभएको थियो ।