काठमाडौं । राष्ट्रिय जनमोर्चाका अध्यक्ष चित्रबहादुर केसीले डा. गोविन्द केसीका माग पुरा गरी जीवन रक्षा गर्न सरकारसँग माग गर्नुभएको छ ।
आइतबार एक वक्तव्य प्रकाशित गरी अध्यक्ष केसीले डा. केसीका माग मागहरु जनपक्षीय, न्यायपूर्ण र सही भएका उल्लेख गर्दै सरकारले ती मागहरु पुरा गर्न र कार्यान्वयन गर्न पटक पटक लिखित सहमति र सम्झौता गरेको तर कार्यान्वयनमा इमान्दारिता देखाउन नसकेको बताउनुभएको छ ।
यस्तै, प्रदेश नं. ५ को नाम लुम्बिनी राख्ने प्रदेश मन्त्रिमण्डलको प्रस्तावलाई राजमोले समर्थन गरेको छ । प्रदेश राजधानीका सन्दर्भमा भने अधिकार सम्पन्न आयोग बनाई राजधानी ठेगान गर्नुपर्ने राजमोले दोहोर्याएको छ ।
वक्तव्यमा भनिएको छः
‘१. डा. गोविन्द केसीले चिकित्सा शिक्षा र स्वास्थ्य क्षेत्रका समस्याहरुका विरुद्ध मागहरु राखेर संघर्ष गर्दै आएका छन् । ती समागहरु जनपक्षीय, न्यायपूर्ण र सही छन् । उनको संघर्षको दौरानमा सरकारले ती मागहरु पुरा गर्न र कार्यान्वयन गर्न पटक पटक लिखित सहमति र सम्झौता गरेको छ ।
तर तिनलाई सरकारले कार्यान्वयन गरेको छैन । सहमति र सम्झौता गरेर पनि तिनलाई कार्यान्वयन नगर्नु सरकारको इमान्दारिता भएन । सरकारको यस प्रकारको गैर जिम्मेवार तरिकाको हामीले विरोध गर्दछौँ । डा. केसी अहिले पनि आफू र सरकारबीच भएका सहमति र सम्झौतालाई कार्यान्वयन गराउन भोक हडतालको संघर्षमा छन् ।
उनको स्वास्थ्य एकदम कमजोर हुँदै गएको छ । हमीले उनीसँगका सहमति र सम्झौता कार्यान्वयन गर्न र डा। के।सी।को जीवन रक्षाका लागि सरकारसँग आग्रह गर्दछौँ ।
२. प्रदेश नं. ५ को नाम लुम्बिनी राख्ने प्रदेश मन्त्रिमण्डलको प्रस्तावलाई हाम्रो पार्टीले सही मान्दछ र समर्थन गर्दछ । प्रदेशको राजधानी भालुवाङ राख्ने बारेमा हाम्रो भिन्न भनाई छ । हामीले पहिलदेखि नै प्रदेशको नाम र राजधानीको विषयमा अधिकार सम्पन्न विज्ञहरुको आयोग बनाई त्यस आयोगको सिफारिस अनुसार गर्नुपर्छ भनेका छौँ ।
अन्य प्रदेशहरुको हकमा पनि हाम्रो त्यही नीति छ । प्रदेश नं. ५ ले अन्यथा तरिकाले निर्णय गर्दा त्यहाँ विवाद उत्पन्न भएको छ । अहिले पनि हामीले अधिकार सम्पन्न आयोग बनाई राजधानी ठेगान गर्ने कुरामा जोड दिन्छौँ।’
