पोखरा । गण्डकी प्रदेशका सांसद पियारी थापाले देशमा दण्डहीनता झन् झन् मौलाउँदै गएको बताउनुभएको छ । प्रदेश संसदको बैठकलाई शुक्रबार सम्बोधन गर्दै राष्ट्रिय जनमोर्चाका सांसद थापाले महिला तथा बालबालिकाहरुमाथि जघन्य अपराधका घटना बढेर गएको बताउनुभयो ।
मुलुकमा तीन तहको सरकार भएपनि सरकार हरेक ठाउँमा असफल हुँदै गएको थापाले आरोप लगाउनुभयो । उहाँले भ्रष्टाचार नियन्त्रण, सुशासन वा विकास निर्माण कहिँ पनि सरकारले जनअपेक्षा अनुसार काम गर्न नसकेको बताउनुभयो ।
सांसद थापाले भन्नुभयो, ‘भ्रष्टाचार न्यूनीकरण गर्ने सवालमा होस्, विकास निर्माण गर्ने सवालमा होस्, सुशासनको सवालमा होस् वा शान्ति सुरक्षा प्रत्याभूत गर्ने सवालमा । अथवा पटक–पटक लकडाउनको बन्दीपछि कोभिड–१९ को नियन्त्रन गर्ने सवालमा फ्याँकेको सरकारका सबै रामबाणको तिर भुत्ते भएको छ ।’
सांसद थापाले महिला तथा बालबालिकाहरु दिनदिनै विभिन्न हिंसाबाट पीडित हुनु परेको भन्दै यसको मुख्य जिम्मेवारी सरकार लिनुपर्ने हो कि होइन ? भनि प्रश्न पनि गर्नुभयो । निर्मला पन्त, सम्झना विकलगायत बालिकाहरुको बलात्कारपछि हत्या गर्नेजस्तो जघन्य अपराधलाई सरकारले निस्तेज पार्न नसकेको उहाँले बताउनुभयो ।
‘बालबालिकालाई सुरक्षित राख्न अब नेपाली जनताले कुन लोकको सिर्जना गर्नुपर्ने हो ?’ थापाले प्रश्न गर्नुभयो, ‘के हाम्रा छोरीचेलीले कहिल्यै पनि सुरक्षित रहन सक्दैनन् ?’
उहाँले यसप्रति सरकारले क्षमायाचना गरि यथाशीघ्र सुरक्षाको व्यवस्था गर्न माग पनि गर्नुभयो । कतिपय विषय मिलेमतोमा गुपचुप पारिएको र सामान्य प्रकारको मिलापत्र बनाएर अपराधीलाई उन्मुक्ति दिइएको प्रति पनि उहाँले आपत्ति जनाउनुभयो ।
सांसद थापाले महिला तथा बालबालिकामाथि हुने हिंसाका मुद्दा फास्ट ट्रयाकबाट टुंगो लगाउन माग पनि गर्नुभयो । दण्डहीनता एवं महिला र बालहिंसाविरुद्ध महिला सांसदहरुले आफ्नो भूमिका बढाउनुपर्ने आवश्यकतामा जोड दिँदै उहाँले सशक्त आवाज उठाउन सैसँग आग्रह गर्नुभयो ।
