पुष्कर भट्ट, महेन्द्रनगर ।
लमो समयदेखि तलव नपाएको भन्दै संस्थागत विद्यालयका शिक्षकहरुले भीमदत्त नगरपालिकामा धर्ना दिएका छन् । संस्थागत विद्यालयका शिक्षकहरुको संगठन ‘संस्थागत विद्यालय शिक्षक युनियन (इस्टु)’ ले बिहीबार नगरपालिकामा एक घण्टा धर्ना दिएको हो ।
संस्थागत विद्यालयले लकडाउन अवधिमा शिक्षकलाई बेवास्ता गरेको भन्दै शिक्षकहरु आन्दोलनमा उत्रिएका हुन् । यसअघि शिक्षकहरुले भीमदत्त नगरपालिकाका शिक्षा शाखा प्रमुखलाई ज्ञापन पत्र बुझाएकोमा नगरपालिकाले विद्यालयका मालिकसँग छलफल गरी माग पुरा गराउने आश्वासन दिएपनि कुनै सुनवाई नगरेको युनियनका सचिव शंकर प्रसाद जोशीले बताउनुभयो ।
बिगतमा तीन पक्षबीच छलफल गरी व्यावहारिक रुपमा तलब दिने निर्णय भएको भिनपाका शिक्षा शाखा प्रमुख हरि प्रसाद जोशीले बताउनुभयो। निजी विद्यालयका शिक्षकहरुले बाँकी रहेको तवलसहित लकडाउनको अवधिको तलब पाउनुपर्ने माग गर्दै आन्दोलन गरिरहेका छन् ।
