काठमाडौं । सरकारले चिकित्सा शिक्षा सुधारको माग राख्दै अनशनमा बस्नु भएका डा. गोविन्द केसीलाई सत्याग्रह तोड्न आग्रह गरेको छ । सरकारका प्रवक्ता परराष्ट्रमन्त्री प्रदीप ज्ञवालीले डा. केसीका अधिकांश माग पुरा हुने चरणमा रहेको भन्दै सत्याग्रह तोड्न आग्रह गर्नुभएको हो ।
बिहीबार बसेको मन्त्रिपरिषद्का निर्णय सार्वजनिक गर्न आयोजित पत्रकार सम्मेलनमा मन्त्री ज्ञवालीले डा. केसीले राखेका चिकित्सा शिक्षा सुधारको सबै माग पुरा हुने चरणमा रहेकोले सत्याग्रह तोडन आग्रह गर्नुभएको हो ।
डा. केसी चिकित्सा क्षेत्रको माग गर्दै केही दिन देखि जुम्लाबाट सत्याग्रह सुरु गर्दै अहिले काठमाडौंको त्रि.वि. शिक्षण अस्पतालमा रहनुभएको छ । मन्त्री ज्ञवालीले डा. केसीले उडाउनुभएका मागहरु पुरा भएर कार्यान्वयनमा गइसकेकाले सत्याग्रह बस्नुपर्ने अवस्था नरहेको बताउनुभयो । डा. केसीको माग अनुसार चिकित्सा शिक्षा सम्बन्धी ऐन बनाई त्यसको आधारमा उच्चस्तरीय आयोग निर्माण गरिसकेको पनि उहाँले बताउनुभयो ।
त्यस्तै चिकित्सा शिक्षाका लागि गत आर्थिक वर्षमा ७५ प्रतिशत छात्रवृति कार्यान्वयनमा आइसकेको पनि मन्त्री ज्ञवालीले बताउनुभयो । मन्त्री ज्ञवालीले सातवटै प्रदेशमा सरकारी तवरबाट मेडिकल कलेजहरु खोल्न राखेको माग अनुसार सबै प्रदेशमा मेडिकल कलेज सञ्चालनमा आउन लागेको पनि बताउनुभयो ।
अन्य विषयमा पनि सरकारले आफ्नो साधन स्रोतले भ्याएसम्म प्रयत्न गरिरहेको पनि उहाँले बताउनुभयो । पीसीआर परीक्षण बढाउनुपर्ने मागमा पनि सरकारले परीक्षणको दायरालाई बढाई हाल सम्म १० लाख बढीको परीक्षण भइसकेकाले केभिडको महामारिको अवस्थामा पुरा भइसकेका विषयलाई माग बनाएर दावाव नदिन मन्त्री ज्ञवालीले आग्रह गर्नुभयो ।
लोकसेवामा रोकिएको परीक्षा सञ्चालन हुने
सरकारले लोकसेवा आयोगलाई नयाँ पदपूर्तिका लागि बाटो खोलिदिएको छ । मन्त्री ज्ञवालीले पदपूर्तिका लागि विज्ञापन गर्न र विज्ञापन भएपछि पनि परीक्षा दिन लगाएको प्रतिबन्ध हटाएको बताउनुभयो । कोरोना संक्रमणका कारण सरकारले गत वैशाखदेखि लोकसेवाको परीक्षा स्थागित गराएको थियो।
‘रिक्त पदपूर्तिका लागि विज्ञापन भएको तर परीक्षा हुन बाँकी रहेको र पदपूर्तिका लागि विज्ञापन आह्वान गर्न बाँकी रहेका, नियमित पदपूर्तिको सबै व्यवस्था रहेको रोक हटाइएको छ’ प्रवक्ता ज्ञवालीले भन्नुभयो ।
