काठमाडौं । एमसीसीका विरुद्ध आन्दोलनरत संयुक्त विद्यार्थी संगठनका नेताहरुले नेकपा (मसाल) का महामन्त्री मोहनविक्रम सिंह र राष्ट्रिय जनमोर्चाका अध्यक्ष चित्रबहादुर केसीसँग भेट गरेका छन् । राष्ट्रिय जनमोर्चाको केन्द्रीय कार्यालय, कपनमा भेटघाट भएको हो ।
मसालका महामन्त्री सिंहले एमसीसी अमेरिकी साम्राज्यवादको खतरनाक रणनीति भएकोले यसका विरुद्ध संयुक्त आन्दोलन उठाउनुपर्नेमा जोड दिनुभएको थियो । नेपालको राष्ट्रियता र सार्वभौमसत्तामाथि भारतले लगातार हस्तक्षेप गर्दै आएको, सीमा अतिक्रमण गरेको उल्लेख गर्दै महामन्त्री सिंहले चीन नेपालको लागि कैयौं महत्वपूर्ण रहेको बताउनुभयो । चीन साम्राज्यवादी देश भए पनि नेपालको राष्ट्रियताको लागि महत्वपूर्ण रहेको छ, महामन्त्री सिंहको भनाइ रहेको थियो ।
विद्यार्थी नेताहरुले कम्युनिष्ट एकताको बारेमा राखेको जिज्ञासामा सिंहले विचार र सिंद्धान्तको आधारमा एकता हुनुपर्ने बताउँदै त्यो सम्भव नभएमा कार्यगत एकता गरेर देशका समस्याहरुको समाधानमा ध्यान दिनुपर्ने उल्लेख गर्नुभयो । विश्वमै कम्युनिष्ट आन्दोलन कमजोर बन्दै गएको भन्दै सिंहले नेपालमा युवाहरु थप सचेत ढंगले विश्व दृष्टिकोण उठाउँदै कम्युनिष्ट आन्दोलनमा सक्रिय हुन अनुरोध गर्नुभयो ।
राष्ट्रिय जनमोर्चाका अध्यक्ष चित्रबहादुर केसीले विद्यार्थीहरुको संयुक्त आन्दोलनमा पार्टीको तर्फबाट ऐक्यबद्धता प्रकट गर्नुभयो । संयुक्त आन्दोलन अहिलेको अपरिहार्य आवश्यकता भएको बताउँदै केसीले देशको राष्ट्रियता र सार्वभौमसत्ताको विषयमा विद्यार्थीहरु एकजुट हुनु खुशीको कुरा भएको बताउनुभयो ।
अखिल (छैठौं), विप्लब निकट अखिल (क्रान्तिकारी), नेकपा क्राान्तिकारी माओवादी निकट अखिल (क्रान्तिकारी), नेकपा माओवादीकेन्द्र निकट अखिल (क्रान्तिकारी), अखिल (पाँचौं) र अखिल नेपाल विद्यार्थी युनियनले एमसीसीका बारेमा राजनीतिक पार्टीहरुसँग छलफल गर्दै आएका छन् ।
संयुक्त विद्यार्थी संगठनको तर्फबाट यसअघि नेकपा (क्रान्तिकारी माओवादी) का नेता सीपी गजुरेल, नेकपा (माले) का महासचिव सीपी मैनाली, नेकपा (माओवादी केन्द्र्र) का अध्यक्ष गोपाल किरातीलाई भेट गरी संयुक्त आन्दोलनका बारेमा छलफल गरिएको र जनता समाजवादी पार्टीका अध्यक्ष उपेन्द्र यादवलाई एमसीसी खारेज गर्न माग गर्दै ज्ञापनपत्र बुझाइएको अखिल (छैठौं) का अध्यक्ष विमल पोखरेलले बताउनुभयो ।
