काठमाडौँ । महान् रुसी अक्टोबर क्रान्ति तथा चिनियाँ नयाँ जनवादी क्रान्तिलाई स्मरण गर्ने गरी २०७७ असोज १५ गते भर्चुअल माध्यमबाट एउटा कार्यक्रम सम्पन्न भएको छ । “रुसको अक्टोबर क्रान्तिदेखि चीनको अक्टोबर क्रान्ति मास समारोह आयोजक समिति” को ब्यानरमा सो कार्यक्रम सम्पन्न भएको हो ।
उपस्थित सबैले ‘इङ्कलाब जिन्दावाद !’ नारा लगाएर कार्यक्रमको उद्घाटन गरिएको थियो । सहिदको सम्मानमा भावपूर्ण श्रद्धाञ्जलीस्वरूप एक मिनट मौनधारणपछि सहभागीले सामूहिक रूपमा अन्तर्राष्ट्रिय गीत गाएका थिए ।
कार्यक्रममा उक्त अभियानका संयोजक स्वनाम साथी, समीर सिंह, मीना पुन, मातृका पोख्रेल, घनश्याम शर्मा पौडेल, शेषमणि आचार्य, रोहित बास्तोला र रणेन्द्र बरालीले मन्तव्य राख्नुभएको थियो । कार्यक्रममा सहभागीलाई सरिता महर्जनले धन्यवाद दिनुभएको थियो ।
आजको कार्यक्रम चिनियाँ नयाँ जनवादी क्रान्तिलाई स्मरण गर्दै सम्पन्न गरिएको सो अभियानका सदस्य समीर सिंहले युगदर्शनलाई बताउनुभयो । उहाँले भन्नुभयो– ‘अक्टोबर क्रान्ति दिवस अर्थात् नोभेम्बर ७ सम्म गोष्ठी, अन्तक्र्रियालगायतका कार्यक्रम गरी अक्टोबर क्रान्ति र चिनियाँ क्रान्तिलाई स्मरण गरिने छ ।’
उहाँले आजैका दिन चितवन, पोखरालगायतका स्थानमा पनि यस्तै कार्यक्रम भएको जानकारी दिनुभयो ।
ती दुई क्रान्तिलाई स्मरण गर्न स्वनाम साथीको संयोजकत्वमा समीर सिंह, रामप्रकाश पुरी, लक्षिराम आचार्य, जीवन शर्मा, मधु क्षेत्रीसहितको “रुसको अक्टोबर क्रान्तिदेखि चीनको अक्टोबर क्रान्ति मास समारोह आयोजक समिति” गठन गरिएको बताइएको छ ।
