काठमाडौं । सरकारले पूर्व अर्थमन्त्री युवराज खतिवडालाई अमेरिकाको राजदूत नियुक्त गर्न सिफरिस गर्ने निर्णय गरेको छ । यस्तै मुख्य सचिव लोकदर्शन रेग्मीलाई बेलायतको राजदूतको लागि सिफरिस गरिएको छ ।
बिहीबार बसेको मन्त्रिपरिषद बैठकले पूर्वअर्थमन्त्रीसमेत रहेका प्रधानमन्त्रीका आर्थिक सल्लाहकार खतिवडालाई अमेरिकाका लागि नेपाली राजदूत नियुक्त गर्न सिफारिस गरेको हो । यस्तै, मुख्यसचिव रेग्मीलाई बेलायतका लागि राजदूत बनाउने निर्णय गरिएको स्रोतले बताएको छ।
मुख्यसचिव रेग्मीको कार्यकाल सकिन केही दिनमात्रै बाँकी छ । रेग्मीले आजै मुख्यसचिव पदबाट राजीनामा दिएका छन् । मन्त्रिपरिषदले परराष्ट्र सचिव शंकरदास बैरागीलाई मुख्यसचिव बनाउने निर्णय गरेको छ ।
लामो समयदेखि प्रधानमन्त्री केपी शर्मा ओलीसँग निकट रहेर काम गरेका खतिवडालाई कर्मचारी पृष्ठभूमिबाट आएर सबैभन्दा बढी लाभको पद पाउने ‘भाग्यमानी’ मा पर्छन । नेपाल राष्ट्र बैंकको गभर्नर हुँदै राष्ट्रिय सभा सदस्य र अर्थमन्त्री तथा प्रधानमन्त्रीका आर्थिक सल्लाहकार पछि अमेरिकी राजदूत हुने सौभाग्य उनलाई प्राप्त भएको छ ।
अब राष्ट्रपतिले खतिवडा र रेग्मीलाई राजदूत नियुक्त गर्नुअघि संसदीय समितिले सरकारको सिफारिस अनुमोदन गर्नुपर्नेछ । त्यसका लागि संसदले चाँडै नै सुनुवाइ प्रक्रिया सुरू गर्ने बताइएको छ ।
