पुष्कर भट्ट, महेन्द्रनगर ।
केही वर्ष अघिसम्म ‘रिफर सेन्टर’ को रुपमा परिचित कञ्चनपुरको महेन्द्रनगरस्थित महाकाली अञ्चल अस्पतालले बिस्तारै मुहार फेर्न थालेको छ । कृष्ण दत्त जोशी (बोक्सर)ले अस्पताल व्यवस्थापन समिति अध्यक्षको जिम्मेवारी सम्हालेपछि महाकाली अस्पतालले विगतको ‘रिफर सेन्टर’ को परिचयबाट आफूलाई सुविधासम्पन्न अस्पतालको रुपमा विकास गर्दै लगेको हो ।
अस्पताल व्यवस्थापन समिति अध्यक्ष जोशी आफैँ बिरामी समक्ष पुगेर उनीहरुको समस्या सुन्ने र ती समस्या समाधानको प्रयासमा लाग्ने गरेको बिरामी र तिनका आफन्त बताउँछन् ।
केही वर्ष अघिसम्म सामान्य बिरामी भएपनि उपचारका लागि सीमावर्ती भारतीय शहर खटिमा लगायतका भारतीय अस्पतालमा जानुपर्ने बाध्यता थियो । तर त्यो बाध्यता बिस्तारै हट्दै गएको छ । हाल महाकाली अस्पतालमा २९ जना डाक्टरहरु कार्यरत रहेका छन् । ति मध्ये १७ जना विभिन्न रोग विशेषज्ञ छन् ।
अध्यक्ष जोशीका अनुसार ६ शैय्याको आकस्मिक उपचार केन्द्र (आईसीयू) बाट अस्पतालले सेवा प्रदान गरिरहेको छ भने उपचारका लागि आवश्यक कैयौं नयाँ मेशिनरी जडान गरि सञ्चालन गर्न सफल भएको छ । सुविधा बढेसँगै अहिले अस्पतालमा बिरामीको चाप समेत बढेको अध्यक्ष जोशी बताउनुहुन्छ ।
तत्कालिन रुपमा चिकित्सक आवास, फोहोर व्यवस्थापन, पार्किङको व्यवस्थालगायत केही समस्या रहेको र ती समस्यालाई निकट भविष्यमा नै समाधान गर्ने प्रयास भइरहेको अध्यक्ष जोशीले बताउनुभयो ।
यस्तै अस्पताललाई शिक्षण अस्पतालका रुपमा विकास गर्ने योजना बनाएको पनि जोशीले युगदर्शनलाई बताउनुभयो । अस्पतालले स्टाफ नर्सलगायत अन्य प्राविधिक जनशक्ति तयार पार्न पाठ्यक्रम विकास गरिरहेका उहाँले जानकारी दिनुभयो ।
दैनिक सुधारको बाटोमा रहेको अस्पताललाई थप सुविधा सम्पन्न बनाउन चिकित्सक–कर्मचारी, स्थानीय नागरिक, बुद्धिजीवी, राजनीतिक दललगायत सबैसँग सहयोगको अपेक्षा गरिएको अध्यक्ष जोशीले बताउनुभएको छ ।
