काठमाडौं । सत्तारुढ दल नेपाल कम्युनिस्ट पार्टी (नेकपा)का उपाध्यक्ष वामदेव गौतमको राष्ट्रिय सभामा गरिएको नियुक्ति खारेज गर्न माग गर्दै दायर भएको रिटमा आज (बुधबार) बहस हुँदैछ ।
बहसमा गौतमको पक्षबाट नेपाल बार एसोसियसनका पूर्वअध्यक्षसहित १३ जना चर्चित अधिवक्ताले बहस गर्दै छन् । गौतमलाई राष्ट्रियसभा सदस्य बनाउनुपर्छ भन्ने पक्षमा वरिष्ठ अधिवक्ता शेरबहादुर केसी, राघवलाल वैद्य, प्रेमबहादुर खड्का, चन्द्रकान्त ज्ञवाली, कुमार शर्मा आचार्यलगायतकाले बहस गर्ने भएका हुन् ।
यसका साथै गौतमलाई राष्ट्रिय सभा सदस्यमा नियुक्त गर्ने सरकार र सोको सिफारिस गर्ने पार्टी नेकपाले समेत छुट्टै अधिवक्ता खटाउने पनि बताइएको छ । सरकारी कार्यालयका तर्फबाट महान्याधिवक्ताको छुट्टै टोलीले गौतमको पक्षमा बहस गर्नेछ ।
मुद्दा दायर गर्ने दिनेश त्रिपाठीका पक्षबाट पनि वरिष्ठ अधिवक्ता हरि उप्रेतीसहित नौभन्दा बढी वकिलले बहस गर्नेछन् ।
भदौ २९ गतेको मन्त्रिपरिषद् बैठकले गौतमलाई राष्ट्रिय सभाको रिक्त पदमा मनोनित गर्न राष्ट्रपति विद्यादेवी भण्डारी समक्ष सिफारिस गरेको थियो । राष्ट्रपतिले सो प्रस्ताव थियो । राक्ष्ट्रपतिले सो प्रस्ताव स्वीकार गरेलगत्तै गौतमलाई असोज १ मा पद तथा गोपनीयताको शपथ दिलाइएको थियो ।
