काठमाडौँ । जातीय समता समाजले केही दिनअगाडि बझाङ मष्टा गाउँपालिकाकी दलित बालिकामाथि भएको बलात्कारको अपराधीलाई कानुनअनुसार हदैसम्मको कारबाही गर्न माग गरेको छ । समाज अध्यक्ष दिलबहादुर विकको हस्ताक्षरमा २०७७ असोज १३ गते जारी प्रेसवक्तव्यमा यस्तो माग गरिएको हो ।
छुवाछूत भेदभाव कसुर र दण्ड सजाय ऐन–२०६८ बनिसकेपछि पनि यस प्रकारको घटना घट्नुले समाजमा दलितप्रति हेर्ने दृष्टिकोणमा कुनै सुधार नआएको निष्कर्ष निकालिएको सो वक्तव्यको पूर्ण पाठ यस्तो छ–
“केही दिनअगाडि बझाङको मष्टा गाउँपालिका–२ खिकाला निवासी १२ वर्षीया बालिका सम्झना विकको बलात्कार र हत्याको घटनाप्रति जातीय समता समाजको गम्भीर रूपमा ध्यानाकर्षण भएको छ । घरदेखि केही टाढा सिममाडी भन्ने ठाउँमा रहेको आफ्नो गोठमा साँझ गाईवस्तुलाई घाँस हाल्न गएको नातिनी राति अबेरसम्म नफर्केपछि खोजतलास गर्दा स्थानीय सिम देउताको मन्दिरभित्र क्षत्विक्षत् अवस्थामा सम्झनाको लास भेटिएको थियो । सर्वप्रथम हामी यो अत्यन्तै नृशंस र जघन्य अपराध भएको हुनाले दोषीउपर हदैसम्मको सजाय गरी पीडितलाई उचित क्षतिपूर्ति दिलाउन सरकारसमक्ष जोडदार माग गर्दछौँ ।
अहिले देशमा आफूलाई कम्युनिस्ट भन्न रुचाउने वामपन्थीको बहुमतको सरकार छ । तर देशमा दलितहरूमाथि हुँदै आएका जातीय उत्पीडन, हत्या, बलात्कारका घटनामा कुनै कमी आएको छैन । ‘छुवाछूत भेदभाव कसुर र दण्ड सजाय ऐन–२०६८’ घोषणा भइसकेपछि पनि छुवाछूत, अन्तर्जातीय विवाह र बलात्कारका कारण दुई दर्जनभन्दा बढी दलित युवायुवती र बालिकाको हत्या भइसकेको छ । यसले हाम्रो समाजमा दलितलाई हेर्ने दृष्टिकोणमा अझै पनि कुनै परिवर्तन आएको छैन भन्ने कुरालाई नै पुष्टि गर्दछ । यी सबै दलित उत्पीडन विरुद्ध कडा कानुनको अभाव र भएका कानुनलाई पनि कडाइपूर्वक लागु गर्ने कुराप्रति सरकारी उदासिनताका परिणाम हुन् ।
त्यसैले सरकारलाई हामी यस प्रकारका घटनालाई रोक्न कडाभन्दा कडा कानुन निर्माण गरी त्यसलाई तत्काल व्यवहारमा कडाइपूर्वक लागु गराउन तदारुकता देखाओस् भन्दै दबाब सृजना गर्न सम्पूर्ण उत्पीडित, दलित तथा समताप्रेमी एवम् न्यायका पक्षधर जनसमुदायलाई अपराधीलाई हदैसम्मको कारवाही गराउन र पीडितलाई न्याय दिलाउन संयुक्त आन्दोलनमा एकजुट हुन आह्वान गर्न चाहन्छौँ ।”
