श्यामलाल पोखरेल, बुटवल ।
स्वास्थ्य तथा चिकित्सा शिक्षा क्षेत्र सुधारका अभियान्ता प्राध्यापक डाक्टर गोविन्द केसीको माग पुरा गरी जीवन रक्षाको ग्यारण्टी गर्न स्वतन्त्र नागरिक समूहले नेपाल सरकारसँग माग गरेको छ ।
डा. गोविन्द केसीले पछिल्लो पटक जुम्लाबाट स्वास्थ्य तथा चिकित्सा क्षेत्रमा सुधारको माग राख्दै अनसन बस्नुभएको छ । काठमाडौंमा अनसनरत केसीको स्वास्थ्य अवस्था कमजोर हुँदै गएकाले स्वास्थ्यप्रति ख्याल गर्न र जायज माग सम्बोधनका लागि स्वतन्त्र नागरिक समूह नेपालका अध्यक्ष विश्वराज गैह्रेले विज्ञप्ति जारी गरी सरकारसँग माग गर्नुभएको छ ।
१९ औं पटक १६ दिनदेखि अनसनरत डाक्टर गोविन्द केसीको स्वास्थ्य अवस्था दिन प्रतिदिन कमजोर भएकाले आफ्ना नागरिकको स्वास्थ्य र नागरिकले उठाएका जायज मागहरु सम्बोधन गर्ने दायित्व सरकारको भएको विज्ञप्तिमा उल्लेख गरिएको छ । प्राडा केसीले उठाएका मागहरु जनपक्षीय भएकाले छिटो भन्दा छिटो माग पुरा गरेर जनताको जनमतलाई कदर गर्न विज्ञप्तिमार्फत स्वतन्त्र नागरिक समूह नेपालले माग गरेको छ ।
सरकार र डा केसीबीच भएका सहमति तथा सम्झौताहरु व्यवहारिक रुपमा कार्यान्वयन गर्नसमेत सरकारसँग माग गरिएको छ । डा केसीले उठाएका मागहरु सरकारले सम्बोधन गर्न नसके सरकारलाई हेर्ने नागरिक समाजको दृष्टिकोणमा परिवर्तन आउन सक्ने अध्यक्ष गैह्रेद्वारा जारी विज्ञप्तिमा उल्लेख छ ।
डा केसीलाई अनसनस्थल जुम्लाबाट काठमाडौं ल्याएको एक दुईसाता वितिसक्दा पनि सरकारले कुनै चासो नदिएकोप्रति स्वतन्त्र नागरिक समूह नेपालको ध्यानाकर्षण भएको विज्ञप्तिमा उल्लेख गरिएको छ ।
संविधानले निर्दिष्ट गरेको स्वास्थ्य, शिक्षा जस्ता नागरिकका आधारभूत मागप्रति सरकार मौन देखिएको र डा केसीको मानव अधिकारसमेत सरकार पक्षबाट हनन् भएको बताइएको छ ।
जुम्लाबाट १९ औँ अनसन सुरु गरेका केसी ८ औँ दिनमा गत असोज ६ गते काठमाडौं आउनुभएको थियो । तयसपछि पनि उहाँले अनसनलाई निरन्तरता दिनुभएको छ ।
चिकित्सा शिक्षा र स्वास्थ्यमा सुधारको माग राखेर पटक पटक सत्याग्रहमा बस्दै आएका केसीले पुराना सहमतिको पालना, कर्णालीमा एमबीबीएसको अध्यन लगाएतका ६ बुँदे माग राखेर १९ औँ अनसन सुरु गरेका गर्नुभएको हो ।
यो पनिः टिचिङ जान लागेका डा. केसीलाई प्रहरीले जबरजस्ती पुर्यायो ट्रमा सेन्टर
