काठमाडौं । काठमाडौंको खुला मञ्चमा दैनिक सयौं नागरिकलाई खाना खुवाउने अभियान चलिरहेको छ । कोरोना भाइरसका कारण रोजगारी गुमाएका सयौं नागरिक खुलामञ्चमा खाना खान लाम लाग्ने गर्दछन् ।
‘हाम्रो टिम नेपाल’ नामक अभियानले करिब एक महिनाभन्दा अघिदेखि नै खुला मञ्चमा निशुल्क खाना वितरण गर्न सुरु गरेको हो । यस्तै अभियान ललितपुरको पाटन र भक्तपुरमा पनि जारी छ ।
‘हुनेले दिऔं, नहुनेले लिऔं’ भन्ने नाराका साथ विभिन्न समाजसेवीहरुबाट संकलित राहतबाट खाना वितरण भइरहेको अभियन्ताहरु बताउँछन् । खुला मञ्चमा दैनिक दर्जनौं स्वयंसेवकहरु खाना बनाउने र वितरण गर्ने काममा व्यस्त देखिन्छन् ।
राजधानीमा केही दिनदेखि लगातार पानी परिरहेको थियो । तर पानीमा रुझ्दै सयौं भोका पेटहरु खानाको लागि लाम लाग्ने गरेका देखिन्थे । अभियन्ताहरुले पनि झरीको प्रवाह नगरी ती नागरिकहरुलाई खाना वितरण गरिहेको दृश्य देख्न सकिन्छ ।
कोरोना भाइरस र लकडाउनका कारण काम नपाएर भोकभोकै बस्नुपर्ने अवस्थाका सयौं नागरिकलाई ‘हाम्रो नेपाल टिम’ ले खाना वितरण गरेर सरकारले पुरा गर्नुपर्ने दायित्व पुरा गरेको छ ।
फोटो/भिडियोः हाम्रो टिम नेपालको ट्वीटरबाट ।
