खुम रायमाझी, कुवेत ।
नेपाली रक्तदाताहरुको अन्तर्राष्ट्रिय संस्था अन्तर्राष्ट्रिय नेपाली रक्तदाता संघको भगिनी संस्थाको रुपमा नेपाली रक्तदाता संघ कुवेत स्थापना भएको छ । कोरोनाको बर्तमान अवस्थामा केन्द्रसँग समन्वय गरी केही समय यता आन्तरिक तयारीमा रहेको कुवेत शाखा आजदेखि आधिकारिक रूपमा गठन भएको हो ।
कुवेतमा नेपाली समाजमा परिचित ब्यक्तित्वहरु समाबेश संस्थाको नेतृत्व समाजसेवी रुपेन हमालले गर्नुहुनेछ भने उपाध्यक्षमा जयनारायण थारु र राज मल्ल ठकुरी रहनुभएको छ । त्यसैगरी सचिवमा गुलाम नबी मनसुर, सह–सचिबमा गङ्गा सुबेदी र कोषाध्यक्षमा दिपेन्द्र खाँड चयन हुनुभएको छ ।
मिडिया प्रमुखमा युग लामासँगै सदस्यहरुमा सन्जय बास्कोटा, दुर्गा ढकाल, दिपा राना मगर र अमित गौतम रहनुभएको छ । तत्कालको लागि ११ सदस्य कार्यसमिति चयन गरेको कुवेत शाखाले छिट्टै समिति बिस्तारमा लाग्ने जनाएको छ ।
समितिको चयन (भर्चुअल) बैठकद्वारा भएको थियो भने बैठकको अध्यक्षतामा अन्तर्राष्ट्रिय रक्तदाता संघका अध्यक्ष अजय सत्यालले गर्नु भएको थियो । बैठकको सञ्चालन संस्थाका केन्द्रीय महासचिव राहुल रेग्मीले गर्नु भएको थियो । बैठकमा उपाध्यक्ष एभरेस्ट गौतम, उपाध्यक्ष बिनोद भट्टराई, कुवेत प्रतिनिधि डम्बर रिमाल तथा संस्थाका अन्य केन्द्रीय पदाधिकारीहरुको उपस्थित रहेको थियो ।
सन २०१४ यता कुवेतदेखि अन्तर्राष्ट्रिय नेपाली रक्तदाता संघ (आईएनबीडीए) का सक्रिय सदस्य डम्बर प्रसाद रिमालको विशेष पहलमा गठित कुवेत शाखाले स्थानीय स्तरमा रक्तदानको क्षेत्रमा नयाँ आयाम सुरुवात गर्ने विश्वास गरिएको छ ।
अन्तर्राष्ट्रिय नेपाली रक्तदाता संघ (आईएनबीडीए) सन् २०१४ मा अमेरिकाको कानुन अनुसार विधिबत दर्ता भइ स्थापना गरिएको एक गैर धार्मिक, गैर राजनीतिक र गैर नाफामुखी संस्था हो । जसले विश्वका २५ भन्दा बढी देशहरूमा आफ्नो सञ्जाल फैलाएको छ ।
यस संस्थाको मुख्य उद्देश्य भनेको विश्वमा रहेका नेपाली समुदायलाई नियमित रुपमा रक्तदान गर्न सहयोग र उत्प्रेरित गर्नु, नियमित रुपमा रक्तदानको व्यवस्था गर्न स्थानीय समितिहरू स्थापना गर्न सहयोग पुर्याउने, रक्तदानको महत्वका बारे चेतना जगाउने, नियमित रक्तदाताहरुको संख्या बढाउन सहयोग गर्ने र नेपाली रक्तदाताहरु र रक्तदान कार्यक्रमलाई सहयोग पुर्याउने विभिन्न एजेन्सीहरुको सहयोगमा नेपाली समुदायहरूको सेवा गर्ने हो ।
नेपालमा हाल रहेको सोधभर्ना रक्तदान प्रबृत्तिलाई पूर्ण स्वयंमसेवी रक्तदानमा परिणत गर्दै नेपाललाई रगत अभाव मुक्त राष्ट्र बनाउने बृहत् उद्देश्य लिई स्वयंमसेवी रक्तदान अभियानमा समर्पित ब्यक्ति तथा संस्थाहरुसँग एकबद्ध हुँदै रक्तदान सम्बन्धी उत्प्रेरणा, बहस पैरवी लगायत बिशेषतः रक्तदान कार्यक्रम सञ्चालनमा सहकार्य गर्ने गराउने उद्देश्य यस संस्थाले लिएको छ।
अन्तर्राष्ट्रिय नेपाली रक्तदाता संघले बिभिन्न देशमा आफ्नो भगिनी संस्थाका रुपमा नेपाली रक्तदाता संघ स्थापना गर्दै आईरहेको छ ।
हालसम्म नेपाली रक्तदाता संघ नेपाल, भारत, फ्रान्स, युएई, कतार, युके, कुवेत, अष्ट्रेलियामा स्थापना गरी सकेको छ भने क्यानडा, जापान, इटली लगायतका देशहरुमा स्थापनाको तयारिमा रहेको छ ।
