काठमाडौं । कैलालीकी पत्रकार निर्मला पहराईको शंकास्पद मृत्यु प्रकरणमा प्रहरीले दुई जनालाई पक्राउ गरेको छ ।
पहलमानपुरकी रिया भनिने २० वर्षीया धना साउदलाई आइतबार कैलाली प्रहरीले अनुसन्धानका लागि पक्राउ गरेको हो । प्रहरीले सँगै काम गर्ने कैलाली एफएमकै पत्रकार ललित जाग्रीलाई यसअघि नै अनुसन्धानका लागि पक्राउ गरेको थियो । २४ वर्षीय जाग्रीलाई युवतीको शव फेला परेकै दिन शुक्रबार पक्राउ गरेको हो ।
मृतकका परिवारले किटानी जाहेरी दिएपछि उनीहरु दुवै जनालाई पक्राउ गरिएको जिल्ला प्रहरी कार्यालय कैलालीका डीएसपी प्रतिक विष्टले युगदर्शनलाई बताउनुभयो ।
मृतक र रियाको बीचमा ललित जाग्री कसको प्रेमि भन्ने विषयमा विवाद भएको बुझिएको प्रहरीले जनाएको छ । विवादपछि आफ्नो निर्मलासँग भेट नभएको ललितले प्रहरीलाई बताएका छन् ।
ललितको टिकटकको भिडियोमा लाइक गरेपछि उनीहरुबीच विवाद सुरु भएको अनुसन्धानमा देखिएको छ । यद्यपी उनीहरुमाथि अनुसन्धान भइरहेकोले अहिले नै केही भन्न नसकिने डीएसपी विष्टले बताउनुभयो ।
‘मृतकका परिवारको किटानी जाहेरीका आधारमा पक्राउ गरिएको हो । आज अदालतबाट म्याद थप गरेर अनुसन्धान गर्दैछौं’ डीएसपी विष्टले भन्नुभयो, ‘पोष्टमार्टमको रिपोर्ट र थप अनुसन्धान पछि नै हत्या वा आत्म हत्या के हो र कसरी भएको हो भन्न सकिन्छ ।’
बुधबारदेखि बेपत्ता २३ वर्षीया निर्मलाको शुक्रबार दिउँसो वडा नं ५ स्थित फुलबारी सामुदायिक वनमा झुण्डिएको अवस्थामा शव फेला परेको थियो ।
कैलालीको घोडाघोडी नगरपालिका ४ की निर्मला र ललित कैलाली एफएममा काम गर्थे । बुधबार बिहान १० बजेदेखि हराएकी निर्मला बिहीबारसम्म पनि घर नआएपछि निर्मलाका दाजु बिशालले इलाका प्रहरी कार्यालय सुख्खडमा जानकारी गराएका थिए ।
दाजु विशाल लगायतका आफन्तले जंगलमा झुण्डिएको अवस्थामा उनको शव फेला पारेका थिए।
यो पनिः दुई दिनदेखि बेपत्ता पत्रकार जंगलमा मृत फेला
