अर्घाखाँची । सवारी दुर्घटना न्यूनिकरण तथा कोरोना भाइरसको संक्रमणबाट सुरक्षित रहन ट्राफिक प्रहरीले अर्घाखाँचीका सडकमै प्रशिक्षण सञ्चालन गरेको छ ।
जिल्लाका विभिन्न स्थानमा प्रहरीले चालक तथा यात्रुलाई सुरक्षा सतर्कता अपनाई सामजिक दूरी कायम गर्ने, स्यानिटाइजर प्रयोग गर्ने, यात्रु वाहक सवारी साधनहरुमा सिट क्षमताको ५० प्रतिशत मात्र यात्रु राख्ने ,मास्कको प्रयोग गर्ने जस्ता बिषयमा सचेत गराएको थियो ।
जिल्ला ट्राफिक कार्यालय अर्घाखाँचीका अनुसार सन्धिखर्क नगरपालिका–१ च्यानडाँडा स्थित सन्धिखर्क – तम्घास सडक खण्डमा प्रहरी सहायक निरीक्षक लोकराज न्यौपानेको कमाण्डमा खटिएको ट्राफिक चेकिङ टोलीले प्रशिक्षण दिएको थियो ।
यस्तै, अस्थाई ट्राफिक प्रहरी पोष्ट ठाडाबाट खटिएको टोलीले सितगंगा नगरपालिका– ठाडा स्थित गोरुसिङगे – सन्धिखर्क सडक खण्डमा, सन्धिखर्क नगरपालिका–६ नरपानी स्थित अस्थाई ट्राफिक प्रहरी पोष्ट नरपानी बाट खटिएको संयुक्त ट्राफिक चेकिङ टोलिले प्रशिक्षण दिएको थियो ।
त्यस क्रममा चालक, सहचालक तथा यात्रुहरुलाई वर्षाको समयमा बाढी पहिरोको कारण सडकमा हुने अवरोध विविध कारणले हुने दुर्घटना र कोरोना भाइरसबाट कसरी सुरक्षित हुने भन्नेबारे बताइएको थियो ।
