धनबीर पुन, नयाँ दिल्ली (भारत) ।
गुल्मीको रुरु गाउँपालिका ५ बम्घाका घनश्याम भण्डारीको दिल्लीमा निधन भएको छ । उनी हाल दिल्ली इस्ट अफ कैलाशमा नोकरी गर्थे भने गोविन्द पुरीमा डेरा गरी बस्थे ।
भण्डारी सिकिस्त बिमारी भएपछि उनका भतिजा टोप प्रकाश भुसालले ३१ अगस्तका दिन बेहोश अवस्थामा दिल्ली अखिल भारत आयुर्विज्ञान संस्थान (एम्स) अस्पतालको आपतकालीन वार्डमा भर्ना गराएका थिए ।
बाहिरी कुनै चोट पटक नभएका भण्डारीलाई अस्पताल प्रशासनले शंकास्पद स्थिति भनि पुलिस केस समेत गराएको थियो ।
कुनै औषधिको रियाक्सन या अन्य कुनै जहरको प्रभावको शंका गरिएता पनि सामान्य जाँच एक्सरे आदिको परीक्षणमा सन्तोषजनक अवस्था नदेखिएकोले टाउकोको सिटीस्क्यान गरिएको थियो । त्यसमा आन्तरिक रक्तश्राव भएकोले ३ सेप्टेम्बरका दिन अपरेशन समेत गरिएको थियो।
उनको उपचारका दौरानमा भतिजा टोप प्रकाश भुसाल र नातेदार रामकृष्ण पंथले हेरविचार गरेका थिए । यस्तै, मूल प्रवाह अखिल भारत नेपाली एकता समाजका कार्यबहाक महासचिव ठाकुर खनाल, पश्चिमोत्तर क्षेत्रीय कोषाध्यक्ष तिलक पाण्डेले समय समयमा भेटघाट, कानुनी एवं प्रशासनिक प्रक्रिया मिलाउन आवश्यकतानुसार नेपालमा समवन्य गर्नु भएको थियोे ।
अस्पतालले ४ युनिट रगतको आवश्यकता देखाएको हुँदा ठाकुर खनाल, रामकृष्ण पंथ, माणिक शर्मा र एक जना भारतीय डोनर दिब्यांस पोपलीले रक्तदान गर्नु भएको थियो । डाक्टरहरुको अनेकन प्रयत्नको बावजुद १६ सेप्टेम्बर २०२० को दिन उनको दुःखद निधन भएको छ ।
मृत भण्डारीको शवको १८ सेप्टेम्बरका दिन दिल्लीको निगम बोध घाटमा दाहसंस्कार गरिएको छ । कोरोनाको त्रासका बावजुद दाहसंस्कारमा मूल प्रवाहका काबा महासचिव ठाकुर खनाल, पश्चिमोत्तर क्षेत्रीय कोषाध्यक्ष तिलक पाण्डे, नयाँ दिल्ली नगर समितिका मन बहादुर पुन र बालकृष्ण पुन, नातेदार टोप प्रकाश भुसाल, रामकृष्ण पंथ, थानेश्वर भण्डारी, विष्णु पाण्डे, साथी मान सिंह र सहकर्मी धनन्जयको उपस्थित रहेको थियो ।
बिमारी घनश्याम भण्डारीको उपचारका लागि मूलप्रवाह क्षेत्रीय सहसचिव शिव केसी, ओखला नगर सदस्य रिम जीएम र श्याम थापाले पनि भेटी सहयोग गर्नु भएको थियोे ।
