बुटवल । परराष्ट्रमन्त्री एवं सरकारका प्रवक्ता प्रदीप ज्ञवालीले अबको केही दिनमै सरकार पुनर्गठन हुने जानकारी दिनुभएको छ ।
शुक्रबार बुटवलमा आयोजित पत्रकार सम्मेलनमा मन्त्री ज्ञवालीले केन्द्र सरकार सहित प्रदेश मन्त्रिमण्डलको पनि पुनर्गठन हुने जानकारी दिनुभएको हो । उहाँले यसबारे गृहकार्य भइरहेको भन्दै हप्ता दश दिन भित्रै मन्त्रिमण्डल पुनर्गठन हुने बताउनुभयो ।
उहाँले पार्टी भित्रको सन्तुलन मिलाउन र सरकारको कामलाई थप प्रभावकारी बनाउन मन्त्रिमण्डल पुनर्गठन गर्नुपर्ने आवश्यकता रहेको बताउनुभयो । मन्त्रीहरुको कार्य मूल्यांकनको आधारमा प्रधानमन्त्रीले अहिलेका केही मन्त्रीलाई निरन्तरता दिने वा नयाँ ल्याउनेबारे निर्णय गर्ने उहाँको भनाई थियो ।
‘प्रधानमन्त्री केपी शर्मा ओलीले कार्य मूल्यांकनका आधारमा मन्त्रिमण्डल पुनर्गठन गर्नुहुनेछ। यसको तयारी भइरहेको छ’ उहाँले भन्नुभयो ।
मन्त्री ज्ञवालीले संघसँगै प्रदेशका मन्त्रीहरु पनि फेरबदल हुने जानकारी दिनुभयो । ‘अब प्रदेशका मन्त्रिमण्डल समेत पुनर्गठन हुनेछन। मुख्यमन्त्री नफेरिए पनि प्रदेश मन्त्री फेरिनुहुनेछ। यसले प्रदेश सरकारको कामको स्पीडलाई थप बलियो बनाउनेछ’, मन्त्री ज्ञवालीले भन्नुभयो ।
कालापानी, लिपुलेक र लिम्पियाधुराको नेपाली भूभाग भारतसंगको कुटनीतिक पहलमा फिर्ता गर्ने प्रयास जारी रहेको बताए।
‘कुटनीतिक पहल भइरहेको छ । प्रधानमन्त्रीज्यूले यस विषयमा समकक्षी भारतीय प्रधानमन्त्री नरेन्द्र मोदीसँग कुरा गर्नुभएको छ’ उहाँले भन्नुभयो ।
