जनकपुरधाम । नेपालको जनकपुरदेखि जयनगरसम्म चल्ने रेल जयनगर स्टेसनमा आइपुगेको छ । शुक्रबार नेपाललाई हस्तान्तरण गर्ने गरी भारतीय कम्पनीले आज साँझ रेल जयनगर ल्याएको हो ।
बिहीबार साँझ रेल जयनगर आएपछि धनुषाको भारतीय सीमावर्ती क्षेत्रका नागरिक रेल हेर्न सीमा पारि पुगेका थिए । उनीहरु नेपालमा रेल चढ्न पाइने आशाले मख्ख परेका देखिन्थे ।
दुई थान रेल भोलि (शुक्रबार) नेपाललाई हस्तान्तरण गर्ने गरी भारतको सरकारी कम्पन्नी कोकण रेलवेज कर्पोरेसन लिमिटेडले ति रेल नेपाल सिमानामा ल्याएको हो ।
रेल विभागका महानिर्देशक बलराम मिश्रका अनुसार पहिलो चरणमा भारतको कुर्थादेखि जनकपुरसम्म ३५ किलोमिटर रेल सञ्चालनको निम्ति सम्पूर्ण संरचना तयारी अवस्थामा छ । दोश्रो चरणमा चल्ने भनिएको जनकपुरको कुर्थादेखि भंगहासम्म १७ किलोमिटरमा भौतिक संरचना निर्माणको काम युद्धस्तरमा भइरहेको छ ।
झण्डै ६ महिना अघि नै भारतमा निर्माण भएको दुईसेट रेल बिहारको पटनामा राखिएको थियो । कोकण रेलवेज कर्पोरेसन कम्पनीसँग उक्त दुईसेट रेल भ्याटसहित झण्डै १ अर्बमा नेपाल सरकारले खरिद गरेको हो ।
पहिलो चरणमा ३५ किलोमिटर रेल सेवा सञ्चालनको लागि केहिदिन अघि रेल विभागले करारमा कर्मचारीसमेत भर्ना लिन आवेदन आह्वान गरेको थियो ।
जयनगरदेखि बर्दिवाससम्म ६९ किलोमिटर लम्बाइको रेल्वे मार्ग तीन खण्डमा बनिरहेको छ । नेपालमा वि.स. १९९४ सालमै जनकपुर–जयनगर रेल सेवा शुरु भएको थियो ।
