काठमाडौं । पहिरोको त्रासमा बाँचिरहेका सिन्धुपाल्चोकबासीलाई भूकम्पले थप त्रस्त बनाएको छ । बुधवार बिहानै सिन्धुपाल्चोकलाई केन्द्र बनाएर दुई पटक भूकम्प गएपछि त्यसले त्यहाँ थप पहिरो जानसक्ने चिन्ता बढेको हो ।

बिहान ५ः१९ मा ६ रेक्टर स्केलको र ६ः१० मा ३.८ रेक्टर स्केलको भूकम्प गएको थियो । अहिलेसम्म भूकम्पले क्षति भएको विवरण नआएपनि त्यसले पहिरोको खतरा बढाउने चिन्ता भएको प्रमुख जिल्ला अधिकारी उमेश ढकालले बताउनुभयो ।

यो वर्ष मनसुन सुरु भएसँगै सिन्धुपाल्चोकमा पहिरोका घटना घटिरहेका छन् । दुई महिनायता मात्रै सिन्धुपाल्चोकमा बाढीपहिरोबाट ७४ जनाले ज्यान गुमाएका छन् भने हालसम्म ४१ बेपत्ता छन् ।

आइतबार बाह्रबिसे नगरपालिका–७ मा गएको पहिरोमा मात्रै १४ जनाको मृत्यु भएको छ भने १७ बेपत्ता नै छन् । असार २२ गते चौतारा साँगाचोकगढी नगरपालिका १२ र असार ९ मा गएको बाढीपहिरोले दुई जनालाई बगाएको थियो भने एक जना अहिलेसम्म बेपत्ता छन् ।

यस्तै असार २४ गते बाह्रबिसे नगरपालिका–५ जम्बुमा बजार नै बगाउने गरी गएको पहिरोले दुई जनाको मृत्यु भयो भने १७ हालसम्म पनि हराइरहेका छन् । त्यस्तै सोही दिन भोटेकोशी गाउँपालिका–४ बुलकुटेमा एक जनाको बाढीले बगाएर ज्यान गयो । यसैगरी साउन १ गते भोटेकोशी गाउँपालिका–४ फूल्पिङमा पहिरोले पाँच जनालाई पुर्यो ।

गत साउन १९ गते राति परेको अविरल वर्षाका कारण मेलम्ची नगरपालिका–११ को कभर्डहल निर्माण गर्ने कामदार सुतेको टहरो नै पुर्दा नौ कामदारले ज्यान गुमाउनपर्यो। यस्तै मेलम्ची खानेपानीको गेट फुटलाखोलाको बेगले दुई जनालाई बगाएको थियो । तीमध्ये एक जना हालसम्म पनि हराइरेहका छन् । एक जनाको तत्काल उद्धार गरिएको थियो ।

सोही दिन पाँचपोखरी थाङ्पाल गाउँपालिका–२ बरुवामा एक दम्पतीले पहिरोमा परी ज्यान गुमाए । साउन ३० गते सिङ्गो गाउँ नै पुरिने गरी गएको लिदी पहिरोमा परी ३६ जनाले ज्यान गुमाएका छन् । सो पहिरोमा पहिरोमा परी जिल्लाभर १३० घर पूर्णरूपमा क्षति भएको प्रमुख जिल्ला अधिकारी उमेशकुमार ढकालले जानकारी दिनुभयो।

बाह्रबिसे नगरपालिकामा ७७, भोटेकोशी गाउँपालिकामा २०, जुगल गाउँपालिकामा २९ र सुनकोशी गाउँपालिकामा चार घर पहिरोले पूर्णरूपमा क्षति भएका हुन् । यस्तै बाढीपहिरोले सयौँ परिवार विस्थापित भएका छन्।

पहिरोका कारण सबैभन्दा बढी बाह्रबिसे नगरपालिकाको एक हजार ४४१ घरधुरीलाई स्थानान्तरण गर्नुपर्ने अवस्था रहेको प्रमुख ढकालले जानकारी दिनुभयो ।

सिन्धुपाल्चोकमात्रै होइन मनसुन सुरु भएदेखि आइतवारसम्म पहिरोका घटनामा परेर देशभर २५० जनाभन्दा बढीको मृत्यु भएको सरकारी विवरण छ जुन गत वर्षको तुलनामा दोबरभन्दा पनि बढी हो ।

लगातारको वर्षा र बाढीका कारण ठुलो जनधनको क्षति भइरहेको अवस्थामा गएको भूकम्पले सिन्धुपाल्चोकसहित प्रभावित क्षेत्रमा अझ त्रास थपेको छ ।