काठमाडौं । काठमाडौंको कीर्तिपुरमा आफ्नै घरमा डेरा गरी बस्ने व्यक्तिको हत्या गरेको अभियोगमा प्रहरीले घरबेटीसहित तीन जनालाई पक्राउ गरेको छ । घरबेटीलाई यसअघि नै पक्राउ गरेको प्रहरीले घटनामा संलग्न भएको आशंकामा आइतबार दुई छोरालाई पनि पक्राउ गरेको हो ।
शुक्रबार कीर्तिपुर नगरपालिका– ७ का ६६ वर्षीय प्रेमलाल महर्जनको कुटाइबाट बारको कलैया घर भइ उनकै घरमा डेरागरी बस्ने ४८ वर्षीय शम्भु चौधरीको ज्यान गएको थियो ।
घरधनी प्रेमकृष्ण महर्जनसँग पानी थाप्ने विषयलाई लिएर सामान्य विवाद हुँदा महर्जनले शम्भु महतोलाई ढोकामा लगाउने काठको आग्लोले प्रहार गरेको प्रहरीले जनाएको छ ।
आग्लो प्रहारबाट घाइते भएका महतोलाई उपचारको लागि किर्तिपुर अस्पताल लगिएकोमा शुक्रबार दिउँसो ज्यान गएको थियो । प्रेमकृष्ण महर्जनलाई प्रहरीले तत्काल पक्राउ गरेको थियो ।
उनका दुई छोराहरु परमेश्वर महर्जन र प्रमोद महर्जनलाई पनि पक्राउ गरिएको हो । घटनामा उनीहरुको पनि संलग्नता देखिएको प्रहरीले जनाएको छ।
