काठमाडौं । प्युठनका चारवटा पत्रकार संगठनले शनिबार सांसद दुर्गा पौडेलको नाम जोडेर विज्ञप्ति प्रकाशित गरेकोप्रति सांसद पौडेलले आफूलाई अचम्म लागेको बताउनुभएको छ ।
आइतबार सांसद पौडेलको सचिवालयले एक वक्तव्य प्रकाशित गरी कपोलकल्पित ढंगले सांसद पौडेलको नाम जोडिएको भन्दै यस्तो कार्यले पत्रकार संगठनकै विश्वसनीयतामाथि प्रश्न उठाउने स्पष्ट पारेको छ ।
केही दिन अघि एक विद्यार्थी नेताले प्युठानका केही पत्रकारहरुको नियतबारे फेसबुकमा असन्तुष्टि प्रकट गरेको विषयलाई लिएर त्यहाँका चारवटा पत्रकारले विज्ञप्ति नै जारी गरेका थिए । सो विज्ञप्तिमा उनीहरुले सांसद पौडेलको निर्देशनमा फेसबुकमा स्ट्याटस लेखिएको भन्दै कपोलकल्पित आरोप लगाएको पौडेलको सचिवालयले जनाएको छ ।
प्युठानबाट प्रतिनिधित्व गर्ने सांसद पौडेल प्रतिनिधिसभामा सम्भवतः सबैभन्दा बढी प्रेस स्वतन्त्रताको वकालत गर्ने सांसदहरुमा पर्नुहुन्छ ।
सांसद पौडेलको सचिवालयद्वारा जारी वक्तव्यमा भनिएको छ,
‘प्यूठानका ४ वटा पत्रकार संगठनले २०७७ भदौ २७ गते एक वक्तव्य प्रकाशित गरी दुर्गा पौडेलको निर्देशनमा पत्रकारका विरुद्ध फेसबुकमा स्टाटस लेख्न लगाएको आरोप लगाइएको छ । उक्त आरोप सही छैन । कपोलकल्पित र मनगढन्ते छ । त्यसले पत्रकार संगठनको विश्वसनीयतामाथि नै प्रश्न खडा गरेको छ । दुर्गा पौडेलको बारेमा कहींकतै प्रसंग नै नउठेको विषयमा आधारहीन आरोप किन लगाउनु परेको हो ?
प्रतिनिधिसभा सदस्य दुर्गा पौडेलका बारेमा कुनै समाचार प्रकाशित भएको छैन । प्रकाशित नै नभएको समाचारको बारेमा केही बोल्नु वा स्पष्टीकरण दिनु आवश्यक थिएन । एक्कासी वक्तव्यमा कृतिम आरोप लगाउने कुराले पत्रकार संगठनहरुको नियतमाथि नै प्रश्न उठेको छ ।
संविधानमै स्वतन्त्र प्रेस ग्यारेन्टी गरिएको छ । स्वतन्त्र प्रेसका बारेमा दुर्गा पौडेलले बारम्बार संसदमै कुरा उठाउनुभएको छ । प्रजातन्त्र र प्रेस स्वतन्त्रताको पक्षमा संसदमा र सडकमा लामो लडाइँ लडेको व्यक्तिमाथि त्यसरी आरोप लगाउनुलाई सही मान्न सकिंदैन । उक्त आरोप फिर्ता लिन अनुरोध छ ।’
