काठमाडौं । गएराति भारी वर्षासँगै गएको पहिरोले सिन्धुपाल्चोकको बाह्रबिसे नगरपालिका–७ मा पर्ने घुम्थाङको नागपुजे, भिरखर्क र नेवार टोलमा घरहरु पुरेको छ । पहिरोमा परी ७ जनाको मृत्यु भएको र २४ जना बेपत्ता भएका विवरण प्राप्त भएको छ ।

घटनास्थलमा खोजीका क्रममा फेला परेकामध्ये तीन जनाको सनाखत भएको छ । नागपुजेकी ६५ वर्षीया भक्तिमाया श्रेष्ठ, भिरखर्कको विक टोलकी २३ वर्षीया जुनुमाया विक र नेवार टोलकी ६० वर्षीया सर्किनी नेवारको पहिचान भएको प्रहरीले जनाएको छ । अन्यको सनाखत हुन सकेको छैन ।

पहिरोले २४ घर पुरिएको विवरण प्राप्त भएको छ ।

सभामुख अग्नि सापकोटासहितको टोली पनि आजै बिहान स्थलमार्गबाट पहिरो प्रभावित क्षेत्रमा पुग्नुभएको छ । घटनास्थलमा नेपाली सेना, सशस्त्र प्रहरी र नेपाल प्रहरीको टोली उद्धारमा खटिएका छन् ।