काठमाडौं । नेपालका २१ वटा हिमताल कुनै पनि बेला फुट्न सक्ने एक अध्ययनले देखाएको छ । हिमालय क्षेत्रबारे काम गर्ने अन्तर्राष्ट्रिय एकीकृत पर्वतीय विकास केन्द्र इसीमोड र संयुक्त राष्ट्रसंघीय विकास कार्यक्रम यूएनडीपीको प्रतिवेदनमा ती हिमतालहरू फुट्नसक्ने जोखिम देखिएको हो ।
त्यसमध्ये नेपालका च्छो रोल्पा र इम्जा हिमताल ‘सबैभन्दा बढी सम्भावित खतरनाक’ रहेको इसीमोडले जनाएको छ।
सार्वजनिक अध्ययन प्रतिवेदनअनुसार नेपाल, तिब्बत र भारतमा ४७ वटा त्यस्ता ‘सम्भावित खतरनाक हिमताल’ रहेका छन् । राजनैतिक सीमाका हिसाबले यस्ता ‘खतरनाक’ हिमतालमध्ये सबैभन्दा बढी २५ वटा तिब्बतमा रहेका छन् । त्यस्तै भारतमा एउटा यस्तो हिमताल रहेको प्रतिवेदनमा उल्लेख छ।
यस्तै, नेपालका लागि सबैभन्दा बढी जोखिम जलविद्युत आयोजनामा देखिएको छ । प्रायः जलविद्युत आयोजनाहरू पनि पहाडमै छन् । कति बन्दै र बन्ने क्रममा पनि छन् ।
उक्त अध्ययनका क्रममा कोशी, गण्डकी र कर्णाली बेसिनमा ३,६२४ वटा हिमताल पाइएको प्रतिवेदनमा उल्लेख छ । त्यसमध्ये २,०७० वटा नेपाल, १,५०९ वटा तिब्बत र ४५ वटा भारतमा पाइएका छन् । तीमध्ये १,४१० हिमताल ०.०२ वर्ग किलोमिटर वा त्योभन्दा ठूला रहेका छन्।
बीबीसीका अनुसार प्रतिवेदनमा भनिएको छ, ‘त्यो भनेको हिमताल फुटेर आउने बाढीका लागि पर्याप्त आकार हो ।’
