काठमाडौँ । काठमाडौँ उपत्यकामा तीन हप्तादेखि जारी निषेधाज्ञा भोलि (भदौ २५ गते) देखि खुल्ला हुने भएको छ । प्रशासनले समय तोकेर पसल खोल्न र जोरबिजोरका आधारमा यातायात सञ्चालन गर्न दिने निर्णय गरेको हो ।
काठमाडौँ उपत्यकामा भदौ ३ गतेदेखि लागु निषेधाज्ञा आज राति १२ बजेदेखि सकिँदै छ । भोलिदेखि यातायात र व्यापार÷व्यवसाय खुलेपनि अन्य क्षेत्रका लागि भने भदौ ३१ गतेसम्म निषेधाज्ञा जारी रहने काठमाडौँका प्रमुख जिल्ला अधिकार जनकराज दाहालले बताउनुभएको छ ।
उहाँका अनुसार सार्वजनिक र निजी यातायातमा जोरबिजोर लागु गर्ने र व्यापार÷व्यवसायलाई शर्तसहित खोल्न दिने टुङ्गोमा प्रशासन पुगेको हो । शैक्षिक संस्था, फिल्म हल र जिमखानालगायत यसअघि बन्द गरिएका क्षेत्र नयाँ निर्णय नभइन्जेल बन्द नै रहने छन् ।
उपत्यकाका तीनै जिल्ला प्रशासनले लगाएको निषेधाज्ञाको अवधि बुधबार मध्यरातसम्म छ ।
यी ८ काम गर्न नपाइने
१. खुल्ला स्थानमा मानिसहरू भेला हुन, भिडभाड गर्न, जुलुस गर्न नहुने ।
२. भिडभाड हुने गतिविधिहरू, जस्तै– जात्रा, महोत्सव, भोजभतेर गर्न नहुने ।
३. मठमन्दिर, मस्जिद, चर्चलगायतका धार्मिक तथा सांस्कृतिक स्थलमा दैनिक नित्य पूजाबाहेकका गतिविधि गर्न नहुने ।
४. बढी भिडभाड हुने उद्योग, व्यापार–व्यवसायमा स्वास्थ्य मापदण्ड विपरीत हुने काम गर्न नहुने ।
५. चाडपर्वलगायतका धार्मिक सांस्कृतिक तथा सामाजिक कार्य गर्नका लागि हुने जमघट गर्न नहुने ।
६. शैक्षिक संस्थाहरू खोल्न नहुने ।
७. सबै प्रकारका सभा, गोष्ठी, तालिम, सेमिनार, सिनेमा हल, पार्टी प्यालेस, मनोरन्जन स्थल, सैलुन, पार्लर, स्पा, स्विमिङपुल, जिमखाना, समूहमा हुने खेलकुद र खेल प्रस्तुति, प्रदर्शनी, पुस्तकालय सङ्ग्राहालय सञ्चालन गर्न नहुने ।
८. उद्योग–व्यवसाय सञ्चालनका लागि स्वास्थ्य मापदण्ड विपरीत श्रमिक ओसारपसार गर्न नहुने ।
यी काम गर्न पाइने छ
१. फुटपाथ, पसल, ठेलाव्यापारी, स्टेसनरी पसल, इलेक्ट्रोनिक र डिपार्टमेन्टल स्टोर बिहान ११ बजेसम्म र ४ बजेदेखि ७ बजेसम्म खोल्न सकिने ।
२. वर्कसप बिहान ८ बजेदेखि बेलुका ८ बजेसम्म खोल्न पाइने तर स्वास्थ्य मापदण्ड लागु गर्नुपर्ने ।
३. उद्योग सञ्चालन गर्दा कामदारले खानेबस्ने व्यवस्थाका लागि अनिवार्य व्यवस्था परिसरभित्रै गर्नुपर्ने । स्वास्थ्य मापदण्ड लागु गर्नुपर्ने ।
४. शिक्षा, विज्ञान तथा प्रविधि मन्त्रालयको प्रोटोकलअनुसार अनलाइन कक्षा सञ्चालन गर्न पाइने ।
